गगन थापाको राजनीतिक प्रतिवेदन: चुनावअघि गठबन्धन नगर्ने, प्रधानमन्त्री दुई कार्यकाल मात्र

नेपाली कांग्रेसका सभापति गगन थापाले आगामी निर्वाचनअघि कुनै पनि दलसँग गठबन्धन नगर्ने प्रस्ताव अघि सार्नुभएको छ। यो प्रस्ताव १५औँ महाधिवेशनमा पेस गर्न तयार पारिएको राजनीतिक प्रतिवेदनमा छ। प्रतिवेदनमा पार्टीको अबको चार वर्षे राजनीतिक, वैचारिक, सांगठनिक र आर्थिक दिशा तय गरिएको छ।

प्रतिवेदनअनुसार कांग्रेस आफ्नै रुख चिह्न, आफ्नै उम्मेदवार र आफ्नै एजेन्डा लिएर मतदातामाझ जानेछ। सदस्यको प्रत्यक्ष मत, प्राइमरी निर्वाचन र सार्वजनिक मतसर्वेक्षणलाई उम्मेदवार छनोटको आधार बनाउने प्रस्ताव छ। छनोटमा गुट र पहुँचभन्दा योग्यता, योगदान र कार्यसम्पादनलाई प्राथमिकता दिइनेछ।

प्रधानमन्त्रीलाई दुई कार्यकालमा सीमित गर्ने संवैधानिक व्यवस्था, ‘राइट टु रिजेक्ट’ अर्थात् कसैलाई पनि मत नदिने विकल्प र विदेशमा रहेका नेपालीलाई मताधिकार दिने प्रस्ताव पनि प्रतिवेदनमा छन्। बितेका दुई दशकमा पार्टी आफ्नो मूल ध्येयभन्दा पद र सत्तातर्फ ढल्केको तथा युवापुस्तासँग टाढिएको प्रतिवेदनले स्वीकार गरेको छ। भदौ २३ र २४ को आन्दोलनलाई षड्यन्त्र मात्र भनेर हेर्न नहुने र त्यसमा उठेका सुशासन, न्याय, अवसर र समानताका मागलाई सम्बोधन गर्नुपर्ने प्रतिवेदनको निष्कर्ष छ।

आर्थिक क्षेत्रमा निजी क्षेत्रलाई अर्थतन्त्रको मुख्य इन्जिन मान्दै विप्रेषणलाई उत्पादनशील क्षेत्रमा लगानी गराउने नीति अघि सारिएको छ। प्रतिवेदनमा दुई दर्जनभन्दा बढी प्रस्ताव समेटिएका छन्।