महाधिवेशन उद्घाटनमा प्रचण्ड र लामिछाने, ओली र देउवा अनुपस्थित

नेपाली कांग्रेसको १५औँ महाधिवेशनको उद्घाटन समारोहमा विभिन्न दलका शीर्ष नेता सहभागी भएका छन्, तर एमाले अध्यक्ष केपी शर्मा ओली र कांग्रेसका पूर्वसभापति शेरबहादुर देउवा पुग्नुभएको छैन। नेपाली कम्युनिस्ट पार्टीका संयोजक पुष्पकमल दाहाल प्रचण्ड र राष्ट्रिय स्वतन्त्र पार्टीका सभापति रवि लामिछाने खुलामञ्च पुग्नुभएको छ। सत्तारूढ दलका सभापति लामिछाने उद्घाटन सत्र चलिरहेकै बेला कार्यक्रमस्थल पुग्नुभएको हो।

पूर्वप्रधानमन्त्री डा. बाबुराम भट्टराई, राप्रपा अध्यक्ष राजेन्द्र लिङ्देन, नागरिक उन्मुक्ति पार्टीका संरक्षक रेशम चौधरी र जसपा नेपालका सहअध्यक्ष शरतसिंह भण्डारी पनि उपस्थित हुनुहुन्छ। श्रम संस्कृति पार्टीका अध्यक्ष हर्क साम्पाङको सट्टा महासचिव आरेन राई सहभागी हुनुभएको छ।

एमालेका प्रचार प्रमुख निरज आचार्यका अनुसार अध्यक्ष ओलीले शुभकामना दिन महासचिव शंकर पोखरेललाई पठाउनुभएको हो, र पोखरेल समारोहमा पुग्नुभएको छ। ओलीको सचिवालयले उहाँ नजाने कुरा आइतबार बिहान पुष्टि गरे पनि कारण खुलाएको छैन। गगन थापा नेतृत्वको संस्थापन पक्षले देउवालाई प्रमुख अतिथिका रूपमा निम्तो दिएको थियो, तर देउवा पक्ष यो महाधिवेशनमा सहभागी छैन।

प्रवक्ता देवराज चालिसेका अनुसार लामिछानेसहितका अतिथि नेताले उद्घाटन समारोहलाई सम्बोधन गर्ने तालिका छ। जसपा अध्यक्ष उपेन्द्र यादव र जनमत पार्टीका अध्यक्ष चन्द्रकान्त राउतलाई पनि निम्तो दिइएको थियो। उद्योग वाणिज्य महासङ्घका अध्यक्ष अञ्जन श्रेष्ठ पनि समारोहमा उपस्थित हुनुहुन्छ।

तालिकाअनुसार असोज १९ र २० गते बन्दसत्र तथा २१ र २२ गते निर्वाचन प्रक्रिया हुनेछ।