कांग्रेसको १५औँ महाधिवेशन खुलामञ्चमा उद्घाटन, आत्मसमीक्षामा नेताहरूको जोड

नेपाली कांग्रेसको १५औँ महाधिवेशन आइतबार काठमाडौँको खुलामञ्चमा औपचारिक रूपमा सुरु भएको छ। सभापति गगन थापाले पार्टीका संस्थापक र अग्रज नेताको तस्बिरमा माल्यार्पण, दीप प्रज्वलन र बिरुवामा जल सेचन गरी उद्घाटन गर्नुभएको छ। ‘परम्पराको सम्मान र परिवर्तनको सङ्कल्प’ नारा राखिएको महाधिवेशन असोज २२ गतेसम्म चल्नेछ।

तालिकाअनुसार असोज १९ र २० गते बन्दसत्र तथा २१ र २२ गते निर्वाचन प्रक्रिया हुनेछ। देश र विदेशबाट करिब साढे ७ हजार प्रतिनिधि भाग लिन आएको आयोजक समितिले जनाएको छ। लगातारको वर्षाका कारण महाधिवेशन तोकिएको मितिभन्दा दुई दिन पछि सुरु भएको हो।

उद्घाटन सत्रमा उपसभापति पुष्पा भुसालले महाधिवेशन पद बाँडफाँटका लागि मात्र नभई आत्मसमीक्षाको थलो बन्नुपर्ने बताउनुभएको छ। सुशासन, संविधान र कानुनी शासनविपरीत काम गर्नेविरुद्ध कांग्रेस बलियो शक्ति बनेर उभिने उहाँले उल्लेख गर्नुभएको छ। महामन्त्री गुरुराज घिमिरेले लोकतन्त्र र राजनीति सही दिशामा छ कि छैन भन्ने प्रश्नको जवाफ खोज्नुपर्ने बताउनुभएको छ।

बागमती प्रदेश सभापति इन्द्र बानियाँले देश बदल्न पहिले कांग्रेस आफैँ बदलिनुपर्ने र तीन पुस्ताको मेल आवश्यक रहेको बताउनुभएको छ। बन्दसत्रका लागि खुलामञ्चमा हिमाल, पहाड र तराई–मधेस नामका तीन हल बनाइएका छन्। प्रचारमा भौतिक ब्यानर र पर्चामा रोक लगाई डिजिटल माध्यम मात्र प्रयोग गरिएको पार्टीले जनाएको छ।