सात वर्षमा सेजबाट करिब साढे चार अर्बको निर्यात

विशेष आर्थिक क्षेत्र, अर्थात् सेजमा रहेका उद्योगले पछिल्ला सात आर्थिक वर्षमा करिब साढे चार अर्ब रुपैयाँ बराबरको सामान निर्यात गरेका छन्। विशेष आर्थिक क्षेत्र प्राधिकरणका अनुसार यो रकम आर्थिक वर्ष २०७६/७७ देखि २०८२/८३ सम्मको हो। सोही अवधिमा यी उद्योगले करिब तीन अर्ब १८ करोड रुपैयाँ बराबरको उत्पादन देशभित्रै बेचेका छन्।

आर्थिक वर्ष २०८२/८३ मा मात्र करिब एक अर्ब तीन करोड रुपैयाँ बराबरको निर्यात भएको प्राधिकरणले जनाएको छ। चुनढुङ्गा, बल्ब, कार्पेट, स्टिलका भाँडा, ट्याङ्की, प्लास्टिकजन्य सामग्री, ग्रेनाइट र फर्नेस आयल मुख्य रूपमा भारत पठाइएको छ। प्राधिकरणका अनुसार भैरहवा सेजमा सञ्चालन अनुमति लिएका २६ उद्योगमध्ये १३ वटा अहिले सञ्चालनमा छन्।

६ वटा उद्योग निर्माणको चरणमा र ७ वटा सम्झौताको प्रक्रियामा छन्। सेजका उद्योगमा करिब ७५० जनाले रोजगारी पाएका छन्। सरकारले सातै प्रदेशमा सेज बनाउने घोषणा गरे पनि हालसम्म भैरहवा सेज मात्र पूर्ण रूपमा सञ्चालनमा आएको छ।