मानवीय सङ्कटमा परेका १२ देशलाई राष्ट्रसङ्घको १६ करोड डलर

संयुक्त राष्ट्रसङ्घले गम्भीर मानवीय सङ्कट झेलिरहेका १२ देश तथा भूभागका लागि आपत्कालीन कोषबाट करिब १६ करोड अमेरिकी डलर निकासा गरेको छ। राष्ट्रसङ्घको मानवीय मामिला समन्वय कार्यालय, ओसीएचएका अनुसार यो रकम शुक्रबार न्यूयोर्कबाट जारी गरिएको हो। नेपाल राष्ट्र बैंकको आजको खरिद दरअनुसार यो रकम करिब २४ अर्ब ६१ करोड रुपैयाँ बराबर हुन्छ।

यसमध्ये करिब १५ करोड डलर आपत्कालीन प्रतिक्रिया कोषबाट १२ वटै ठाउँमा पठाइनेछ। सहायता पाउनेमा अफगानिस्तान, यमन, क्युबा र कब्जामा रहेको प्यालेस्टिनी भूभाग छन्। अफ्रिकी महादेशबाट भने बुर्किना फासो, क्यामरुन, चाड, माली, नाइजर, सोमालिया, सुडान र दक्षिण सुडान गरी आठ देश सूचीमा परेका छन्।

यिनै सङ्कटग्रस्त ठाउँमा अपाङ्गता भएका व्यक्तिको तत्कालको आवश्यकता पूरा गर्न थप करिब १ करोड डलर छुट्याइएको छ। ओसीएचएले यो छुट्टै रकमले अपाङ्गता भएका व्यक्तिसम्म सहायताको पहुँच र समावेशिता बढाउने जनाएको छ। यस वर्ष सबैभन्दा बढी सहायता चाहिने करिब ८ करोड ७० लाख मानिससम्म पुग्ने अभियानअन्तर्गत यो कोष जारी गरिएको हो।

राष्ट्रसङ्घका मानवीय मामिला प्रमुख टम फ्लेचरले सङ्कटमा परेका मानिससम्म सहायता पुर्‍याउन आर्थिक सहयोगसँगै राजनीतिक इच्छाशक्ति पनि अपरिहार्य रहेको बताउनुभएको छ।