जर्मनीद्वारा युक्रेनलाई एक अर्ब युरोभन्दा बढी सहायता र संयुक्त हतियार उत्पादनको तयारी

जर्मन चान्सलर फ्रेडरिक मर्जले युक्रेनको राजधानी किएभ पुगेर राष्ट्रपति भोलोदिमिर जेलेन्स्कीसँग भेट गर्दै युक्रेनलाई निरन्तर समर्थनको प्रतिबद्धता जनाउनुभएको छ। जर्मन सरकारी अधिकारीहरूका अनुसार मर्जले सैन्य सहायताका लागि करिब १ अर्ब युरो र ऊर्जा पूर्वाधार मर्मतका लागि झन्डै ३५ करोड युरोसहितको प्याकेज घोषणा गर्ने तयारी छ। विभिन्न प्रकारका ड्रोन संयुक्त रूपमा उत्पादन गर्ने सम्झौतालाई अन्तिम रूप दिने काम पनि भइरहेको छ।

दुवै नेताले रुसी ड्रोन आक्रमणबाट क्षतिग्रस्त युक्रेनी एकेडेमी अफ साइन्सेजको भवन अवलोकन गर्नुभएको छ। त्यहाँबाट मर्जले रुसी राष्ट्रपति भ्लादिमिर पुटिनलाई 'अर्थहीन युद्ध' अन्त्य गर्न आग्रह गर्नुभएको छ। जर्मनी युद्ध अन्त्यबारे वार्ताका लागि तयार रहेको तर सर्वसाधारणमाथिका आक्रमण रोकिनुपर्ने उहाँले बताउनुभएको छ।

भ्रमणकै क्रममा आइतबार किएभमा पटक–पटक हवाई आक्रमणको साइरन बजेको र विस्फोटका आवाज सुनिएको थियो। मेयर भिटाली क्लित्स्कोका अनुसार एउटा आक्रमणले निप्रो नदीमाथिको नर्दन ब्रिजको सडक खण्ड र तातो पानी आपूर्ति प्रणालीमा क्षति पुर्‍याएको छ। मर्जसँग अर्थतन्त्र तथा ऊर्जा मन्त्री क्याथरिना राइके र सिमेन्स इनर्जी, हेनसोल्ड्ट, डिएल डिफेन्स तथा क्वान्टम सिस्टम्सलगायत कम्पनीका कार्यकारी पनि हुनुहुन्छ।

भ्रष्टाचारविरुद्धको लडाइँलगायत युरोपेली संघले माग गरेका सुधारमा मर्जले युक्रेनी सरकारलाई दबाब दिने अपेक्षा गरिएको छ। जेलेन्स्कीले बुधबार ड्रोन, मिसाइल र सम्बन्धित सफ्टवेयर उत्पादनमा जर्मनीसँग छिट्टै सम्झौता हुने बताउनुभएको थियो। सम्झौताको केन्द्रमा क्वान्टमले परीक्षण गरिसकेको एन्टी–जेट ड्रोनको द्रुत उत्पादन रहने अपेक्षा छ।