अस्ट्रेलियामा नयाँ भिसा नियम लागू, लामो अस्थायी बसाइमा कडाइ

अस्ट्रेलियाले लामो समयसम्म अस्थायी भिसामा बस्ने प्रवृत्ति रोक्न नयाँ भिसा नियम लागू गरेको छ। अक्टोबर २ देखि लागू भएका नियमले विदेशीलाई 'झूटो आशा' बेच्ने भिसा एजेन्ट र अध्यागमन वकिलमाथि पनि कडाइ गर्ने जनाइएको छ। नयाँ व्यवस्थाअनुसार अन्तर्राष्ट्रिय विद्यार्थीले कोर्स परिवर्तन गर्न चाहेमा छुट्टै भिसाका लागि आवेदन दिनुपर्नेछ।

उच्च तहको अध्ययन सकेपछि अस्ट्रेलियामै बस्ने उद्देश्यले तल्लो तहको कोर्समा जान पनि रोक लगाइएको छ। यसअनुसार स्नातक वा स्नातकोत्तर गरेका विद्यार्थी व्यावसायिक तालिमतर्फ सर्न पाउने छैनन्। अन्तर्राष्ट्रिय शिक्षाका सहायक मन्त्री जुलियन हिलले यी परिवर्तनको उद्देश्य 'स्थायी रूपमा अस्थायी' आप्रवासन रोक्नु रहेको बताउनुभएको छ।

अस्ट्रेलियालीले विदेशमा वर्षौँसम्म एक भिसाबाट अर्कोमा सर्ने र अर्को देशको पुनरावेदन प्रणालीको अनुचित फाइदा लिने अधिकार नराख्ने हुँदा पाहुनाले पनि त्यसो गर्न नहुने उहाँको भनाइ छ। हिलका अनुसार सन् २०२७ जुलाई १ देखि कोर्स परिवर्तन गर्ने विद्यार्थीको भिसा थप गरिने छैन। सुरुका महिनामा कक्षा छाड्ने, अनुत्तीर्ण हुने र सस्तो कलेजमा सर्ने अभ्यास रोक्न यो व्यवस्था गरिएको उहाँले उल्लेख गर्नुभएको छ।

गृहमन्त्री टोनी बर्कले नयाँ नियमले विद्यार्थीको 'भिसा हपिङ' अन्त्य गर्ने र आप्रवासन प्रणालीप्रति जनविश्वास बढाउने बताउनुभएको छ। उहाँका अनुसार स्थायी बसोबासको योग्यता पूरा गर्न नसक्नेहरू एउटा भिसाबाट अर्कोमा सर्दै पुनरावेदनको सहारामा लामो समय बस्ने गरेका छन्।