ललितपुरमा आठ देशका अनुसन्धानकर्ता सहभागी अन्तर्राष्ट्रिय प्रविधि सम्मेलन सुरु

ललितपुरमा असोज १७ गतेदेखि आठ देशका अनुसन्धानकर्ताको सहभागितामा कम्प्युटिङ, विज्ञान, इन्जिनियरिङ तथा प्रविधिमा नवप्रवर्तनसम्बन्धी तेस्रो अन्तर्राष्ट्रिय सम्मेलन–२०२६ सुरु भएको छ। नेपाल कलेज अफ इन्फर्मेसन टेक्नोलोजी, अर्थात् एनसीआईटीले ग्वार्कोस्थित रोयल टुलिपमा यो सम्मेलन आयोजना गरेको हो। सम्मेलनमा नेपालका अतिरिक्त भारत, चीन, बेलायत, अमेरिका, फ्रान्स, अस्ट्रेलिया र मलेसियाका अनुसन्धानकर्ता सहभागी छन्।

आयोजकका अनुसार सम्मेलनका लागि ९७ वटा अनुसन्धानपत्र प्राप्त भएका थिए, जसमध्ये ४६ वटा छनोटमा परेका छन्। छानिएका पत्रहरू सहकर्मी समीक्षा प्रणाली भएको जर्नलमा छापिनेछन्। सम्मेलनको उद्घाटन नेपाल विज्ञान तथा प्रविधि प्रज्ञा–प्रतिष्ठानका उपकुलपति प्राध्यापक डाक्टर जनार्दन लामिछाने, पोखरा विश्वविद्यालयका पूर्वउपकुलपति प्राध्यापक डाक्टर प्रेमनारायण अर्याल र भारतको सरला बिरला विश्वविद्यालयका प्राध्यापक डाक्टर विजय कुमार सिंहले संयुक्त रूपमा गर्नुभएको छ।

सम्मेलनमा प्रविधि र विज्ञानका विभिन्न क्षेत्रका पछिल्ला अनुसन्धान, उपलब्धि र भावी सम्भावनामाथि प्राज्ञिक छलफल हुने कार्यक्रम छ। अनुसन्धानकर्ता र शिक्षाविद्बीच ज्ञान तथा अनुभव साटासाट गर्नु र अन्तर्राष्ट्रिय शैक्षिक सहकार्य बढाउनु सम्मेलनको उद्देश्य रहेको छ।