हाकुवासीको पीडा: भूकम्पले उठिबास, बाढीले फेरि बस्ती उजाड

गोरखा भूकम्पपछि सुरक्षित ठाउँ खोज्दै बसाइँ सरेका रसुवाका हाकुवासी पछिल्लो बाढीले फेरि विस्थापित भएका छन्। रसुवाको उत्तरगया गाउँपालिका–५ अन्तर्गतका खाल्डे, सातविसे र नौबिसेमा अहिले बस्ती छैन। साबिक हाकु गाउँ विकास समितिका गोगने र तिरुलगायतका स्थानबाट विस्थापित परिवारले सुरक्षित जीवनको आशामा खाल्डेमा बस्ती विस्तार गरेका थिए।

भोटेकोशीको भीषण बाढीले करिब ३०० परिवारको आश्रय बगाएपछि खाल्डे अहिले त्रिशूली नदीको बगरमा परिणत भएको छ। घरबारविहीन बनेका परिवार सुरक्षित ठाउँको खोजीमा नुवाकोटको विदुर नगरपालिका–५ बाणाचौतारे आइपुगेका छन्। उत्तरगया–१ का अध्यक्ष मारसिंह तामाङका अनुसार वडाका विभिन्न बस्ती बाढीबाट प्रभावित भएका छन्।

त्यहाँका अधिकांश परिवार २०७२ सालको भूकम्पपछि साबिक हाकुका विभिन्न बस्तीबाट विस्थापित भई सुरक्षित जीवनको खोजीमा आएका थिए।