ग्यास अभाव हटाउन 'क्विक रेस्पोन्स टिम' परिचालन, आपूर्ति सहज हुँदै: उद्योगमन्त्री

उद्योग, वाणिज्य तथा आपूर्तिमन्त्री दीपककुमार साहले खाना पकाउने ग्यासको अभाव हटाउन 'क्विक रेस्पोन्स टिम' बनाएर परिचालन गरिएको बताउनुभएको छ। सोमबार प्रतिनिधिसभाको बैठकमा बोल्दै मन्त्री साहले असोज १ गतेदेखि कृष्णभिर सडकखण्ड दुवैतर्फ सञ्चालनमा आएपछि बजारमा आपूर्ति सहज हुँदै गएको जानकारी दिनुभएको छ। उहाँका अनुसार विभिन्न स्थानमा लुकाइएका करिब १ हजार सिलिन्डर नियन्त्रणमा लिई उपभोक्तालाई वितरण गरिएको छ।

काठमाडौँ उपत्यकामा ढुवानी सहज बनाउन उद्योग, स्थानीय प्रशासन र सुरक्षा निकायबीच समन्वय भइरहेको छ। चाडपर्वको मागलाई ध्यानमा राखी ३ महिनासम्म मासिक करिब ६० हजार मेट्रिक टन ग्यास उपलब्ध गराउन भारत सरकारलाई औपचारिक पत्र पठाइएको मन्त्री साहले बताउनुभएको छ। मन्त्रालयको 'फिसबोन डाइग्राम' विश्लेषणमा आयातमाथिको निर्भरता, विश्व बजारमा मूल्य बढ्नु, भण्डारण र रिफिलिङमा देखिएको समस्या तथा डिलरको असमान वितरणलाई अभावको कारण मानिएको छ।

खाली सिलिन्डर फिर्ता आउन ढिलाइ हुनु, कालोबजारी, डिजिटल ट्र्याकिङ प्रणाली नहुनु र निकायबीचको कमजोर समन्वयले समस्या थप जटिल बनाएको निष्कर्ष छ। आपूर्ति व्यवस्था दिगो बनाउन मन्त्रालयभित्र आन्तरिक समिति बनाएर मार्गनिर्देशन तयार पार्न लागिएको छ भने दीर्घकालीन पूर्वाधार नीति तयार पार्न राष्ट्रिय योजना आयोगलाई पत्राचार गरिएको छ। गलत काम गर्नेमाथि कारबाही जारी रहने उहाँले स्पष्ट पार्नुभएको छ।

नेपाल आयल निगमका अनुसार सबै डिपोमा घरायसी ग्यासको मूल्य प्रतिसिलिन्डर २ हजार ६० रुपैयाँ छ।