जापानमा डुजुआन आँधी: सयौँ उडान रद्द, एसियाली खेलकुदको तालिका फेरबदल

शक्तिशाली समुद्री आँधी डुजुआनले राजधानी टोकियोसहित जापानको पूर्वी भागमा भारी वर्षा र तेज हावा ल्याएको छ। आँधी पूर्वी तटतर्फ बढ्दै गर्दा अधिकारीहरूले धेरै क्षेत्रमा उच्च सतर्कता जारी गरेका छन्। उडान अनुगमन सेवा फ्लाइटराडार–२४ का अनुसार टोकियोका दुई प्रमुख विमानस्थल हानेदा र नारिताबाट झन्डै ५०० उडान रद्द गरिएका छन्।

केही बुलेट ट्रेन सेवा पनि रोकिएका छन् र रेल सञ्चालक जेआरले यात्रुलाई होसियार रहन अनुरोध गरेको छ। जापानी मौसम विभागले कान्तो क्षेत्रमा निरन्तर भारी वर्षा हुने चेतावनी दिँदै नदी बढ्ने, बाढी र पहिरोको खतराप्रति सचेत गराएको छ। इजु द्वीप शृङ्खला र ओशिमामा सबैभन्दा उच्च तहको चेतावनी जारी गरिएको छ।

नागोया र आइची प्रिफेक्चरमा चलिरहेको एसियाली खेलकुद पनि आँधीबाट प्रभावित भएको छ। सोमबारका लागि तोकिएको घोडचढी प्रतियोगिता मङ्गलबारलाई सारिएको छ। रोयटर्सका अनुसार करिब ४ हजार सहभागी बसिरहेको कोस्टा सेरेना क्रुज जहाजलाई खतरा बढे सुरक्षित ठाउँमा लैजाने तयारी छ।

सम्भावित आपत्कालीन अवस्थाको तयारीबारे जापान ओलम्पिक कमिटीसँग छलफल भइरहेको जापानी टोलीका प्रमुख कोसेई इनोउले बताउनुभएको छ। चिबामा हुने रक इन जापान सङ्गीत महोत्सव र टोकियो गेम शोका सोमबारका कार्यक्रम रद्द भएका छन्। प्रधानमन्त्री सानाए ताकाइचीले बासिन्दालाई स्थानान्तरणसम्बन्धी सरकारी निर्देशन पालना गर्न आग्रह गर्नुभएको छ।