इटालीका विद्यालयमा बुर्का प्रतिबन्ध र विदेशी विद्यार्थी सङ्ख्या सीमित गर्ने तयारी

इटाली सरकारले विद्यालयमा अनुहार छोप्ने बुर्का र नकाब निषेध गर्ने तथा प्रत्येक कक्षामा विदेशी विद्यार्थीको सङ्ख्यामा सीमा तोक्ने कानुन ल्याउने तयारी गरेको छ। प्रधानमन्त्री जर्जिया मेलोनीले आइतबार रोममा ब्रदर्स अफ इटाली दलको युवा शाखाको फेनिक्स कार्यक्रममा बोल्दै यो प्रस्ताव छिट्टै मन्त्रिपरिषद्मा पेस हुने बताउनुभएको छ। एकीकरणमा समस्या देखिएका विदेशी विद्यार्थीका आमाबुबाले अनिवार्य रूपमा इटालियन भाषा सिक्नुपर्ने प्रावधान पनि प्रस्तावमा राखिएको छ।

परम्पराका नाममा कुनै युवतीलाई अनुहार लुकाउन बाध्य बनाउन नहुने भन्दै मेलोनीले लैङ्गिक समानतामा कुनै सम्झौता नहुने बताउनुभएको छ। इटाली आएर भविष्य बनाउन चाहनेले भाषा, संस्कृति र देशका नियमको सम्मान गर्नुपर्ने उहाँको भनाइ छ। फोन्डाजियोन आइएसएमयू संस्थाका अनुसार इटालीका विद्यालयमा गैरइटालियन नागरिकता भएका करिब ९ लाख ३० हजार विद्यार्थी अध्ययनरत छन्, जुन कुल सङ्ख्याको करिब ११.६ प्रतिशत हो।

प्रति कक्षा विदेशी विद्यार्थीको अधिकतम सीमा कति हुने भन्ने सरकारले अझै खुलाएको छैन। सन् २०२७ मा हुने आमनिर्वाचनमा आप्रवासन प्रमुख मुद्दा बन्ने अपेक्षा गरिएको छ। सो निर्वाचनमा मेलोनीको दलले आप्रवासनमा अझ कडा नीतिको पक्षधर नेशनल फ्युचर पार्टीको चुनौती सामना गर्नुपर्ने अवस्था छ।