राष्ट्रपति पौडेलले शुभसाइतमा दसैँको टीका ग्रहण गरे, विजया दशमीको शुभकामना

राष्ट्रपति रामचन्द्र पौडेलले यस वर्षको दसैँको टीका, प्रसाद र जमरा शुभसाइतमा ग्रहण गरेका छन्। राष्ट्रपति भवन शीतल निवासमा बुधबार बिहान राष्ट्रपति पौडेलले गुरु पुरोहितबाट टीका जमरा ग्रहण गरेका हुन्।

विजया दशमी, २०८३ का अवसरमा राष्ट्रपति पौडेलले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति र सु-स्वास्थ्यको शुभकामना पनि दिएका छन्।

शुभकामना सन्देशमा उनले विजया दशमी पर्वले पारिवारिक आत्मीयता, आपसी सद्भाव, एकता र सामाजिक सम्बन्धलाई थप सुदृढ बनाउने विश्वास व्यक्त गरेका छन्।

राष्ट्रपति, प्रधानमन्त्री र विभिन्न राजनीतिक दलका प्रमुख नेताहरूले बडादसैँको शुभकामना दिएका छन्। उनीहरूमध्ये सबैजसोले आफ्ना सन्देशमा बाढीपीडितको स्मरण गरेका छन्।