रारामा ४५ करोडको आयोजना चार वर्षमा पनि अलपत्र

कर्णालीको प्रमुख पर्यटकीय गन्तव्य रारा तालमा सुरु गरिएको पर्यटकीय पूर्वाधार आयोजना चार वर्ष बितिसक्दा पनि अलपत्र परेको छ। प्रदेश सरकारको उद्योग, पर्यटन, वन तथा वातावरण मन्त्रालयसँग सम्बन्धित यो आयोजनाको लागत करिब ४५ करोड २९ लाख रुपैयाँ छ। आयोजनाको भौतिक प्रगति करिब २० प्रतिशतमा सीमित छ, तर निर्माण व्यवसायीले करिब ३२ प्रतिशत भुक्तानी पाइसकेका छन्।

आयोजनाको सम्झौता २०७९ असार २४ गते भएको थियो। तोकिएको समयसीमा सकिएपछि मन्त्रालयले म्याद थप्ने प्रक्रिया अघि बढाएको छ, तर निर्माणस्थलमा काम बन्द छ। मन्त्री कल्यानी खडकाले काम अघि नबढाए ठेक्का तोडिने बताउनुभएको छ।

समयमै काम नसकिँदा पर्यटनबाट पाउनुपर्ने फाइदा गुमेको स्थानीयले गुनासो गरेका छन्।