स्पेसएक्स र टेस्ला गाभ्ने प्रस्तावमा मस्कको समर्थन, स्पेसएक्सको नाफा उकालो

अमेरिकी उद्योगपति इलोन मस्कले स्पेसएक्स र टेस्ला कम्पनी गाभ्ने प्रस्तावप्रति समर्थन जनाउनुभएको छ। मङ्गलबार वित्तीय विवरण सार्वजनिक गर्ने छलफलमा उहाँले दुई कम्पनी जोड्दा धेरै फाइदा हुने बताउनुभएको हो। दुवै कम्पनीका स्वतन्त्र सञ्चालक रहेको विशेष समितिले सम्भावित गाभिनेबारे अध्ययन गरिरहेको उहाँले जानकारी दिनुभयो।

स्वार्थ बाझिने भएकाले आफू छलफलमा सहभागी नहुने मस्कको भनाइ छ। सम्झौता अझै निश्चित नभएको र यसका लागि टेस्लाका सेयरधनीको व्यापक समर्थन चाहिने उहाँले उल्लेख गर्नुभयो। जुलाईमा स्पेसएक्स सेयर बजारमा भित्रिएपछि यसबारे सोधिँदा मस्कले कुनै स्पष्ट धारणा दिनुभएको थिएन।

कम्पनीका अनुसार स्पेसएक्सले जुलाईदेखि सेप्टेम्बरसम्मको अवधिमा करिब ४ अर्ब ४० करोड अमेरिकी डलर खुद नाफा कमाएको छ। अघिल्लो वर्षको सोही अवधिमा कम्पनी झन्डै १ अर्ब १० करोड डलर घाटामा थियो। कम्पनीको आम्दानी करिब १६१ प्रतिशतले बढेर झन्डै १४ अर्ब ६० करोड डलर पुगेको छ।

एआई सेवा र कम्प्युटिङ क्षमता भाडामा दिने सम्झौताले नाफा बढाउन मद्दत गरेको कम्पनीले जनाएको छ। कम्पनीको एआई एकाइको आम्दानी झन्डै ९ गुणाले बढेर करिब ७ अर्ब ६० करोड डलर पुगेको छ। मस्कले सन् २०२७ मा थप करिब १० गिगावाट कम्प्युटिङ क्षमता सञ्चालनमा ल्याउने लक्ष्य रहेको बताउनुभएको छ।