अमेरिका–इरान तनाव: रुबियोको कडा चेतावनी, युरेनियम बाहिर नपठाउने इरानको अडान

इरानले आफूसँग रहेको प्रशोधित युरेनियमको एक ग्राम पनि अर्को देशमा नपठाउने अडान सार्वजनिक गरेको छ। इरानको राष्ट्रिय सुरक्षा परिषद्का सचिव मोहसिन रजाईले अमेरिकाले विश्वास जगाउने ठोस कदम नचालेसम्म वार्ता अघि नबढ्ने बताउनुभएको छ। संसद्का सभामुख मोहम्मद बाघेर गालिबाफले गत महिना होर्मुज खोल्न अघि सारिएका ७ सर्त पूरा हुनुपर्ने बताउनुभएको छ।

इरानले अमेरिकी नाकाबन्दी र आर्थिक प्रतिबन्ध हटाउनुपर्ने माग गर्दै आएको छ भने अमेरिकाले इरानको आणविक कार्यक्रममाथि कडा नियन्त्रण चाहेको छ। अर्कोतर्फ, अमेरिकी विदेशमन्त्री मार्को रुबियोले इरानसँग शान्ति सम्झौता अत्यन्त कठिन रहेको बताउनुभएको छ। होर्मुजमा व्यापारिक जहाजमाथि आक्रमण नरोकेसम्म आर्थिक दबाब कायम रहने उहाँको भनाइ छ।

इरानी विदेशमन्त्री अब्बास अराघचीले भने अमेरिकाले सर्त नमानेसम्म होर्मुज जलमार्ग बन्दै रहने जनाउनुभएको छ। पाकिस्तान र कतारको मध्यस्थतामा दुई देशबीच अप्रत्यक्ष वार्ता जारी रहेको उहाँले बताउनुभएको छ। पाकिस्तानको पहलमा दुई पक्षबीच औपचारिक भेटवार्ता पनि भइसकेको छ।

होर्मुज खाडी क्षेत्रबाट विश्व बजारमा कच्चा तेल पुर्‍याउने प्रमुख समुद्री मार्ग हो। पश्चिमी देशहरूले इरानले युरेनियम करिब ६० प्रतिशतसम्म संवर्धन गरेको भन्दै आणविक हतियार बनाउन खोजेको आरोप लगाउँदै आएका छन्।