फ्रान्समा शनिबारको प्रदर्शन नियन्त्रण गर्न प्रहरीसँगै सेना खटिने

फ्रान्स सरकारले आगामी शनिबार हुने प्रदर्शनमा हिंसा र लुटपाट रोक्न प्रहरीसँगै सेना पनि खटाउने निर्णय गरेको छ। प्रधानमन्त्री सेबास्टियन लेकोर्नुले सुरक्षा प्रबन्धमा कमी रहेको स्वीकार गर्दै यसपटक कडा व्यवस्था गरिने बताउनुभएको छ। गृहमन्त्री लरेन नुनेजले पनि अघिल्ला घटनाबाट पाठ सिकेर सुरक्षा रणनीति फेरिने जनाउनुभएको छ।

महँगी, इन्धनको मूल्यवृद्धि र सार्वजनिक सेवामा बजेट अभावविरुद्ध विद्यार्थी संगठन र 'यल्लो भेस्ट' समूहले आन्दोलन जारी राख्ने घोषणा गरेका छन्। यो आन्दोलन २१ सेप्टेम्बरमा पेरिसको उपनगर क्रेतेइलबाट सुरु भएको थियो। त्यहाँका माध्यमिक विद्यालयका विद्यार्थीले जीर्ण भवन, शिक्षकको कमी र असुविधाजनक समय तालिकाको विरोध गरेका थिए।

अहिले देशभरका सहर र बजारमा करिब ५ लाखदेखि ८ लाखसम्म प्रदर्शनकारी सडकमा छन्, जसमध्ये धेरैजसो विद्यार्थी छन्। लिमोज सहरको नगर भवन र लियोनको ऐतिहासिक पर्यटन कार्यालय ध्वस्त भएका छन् भने सयौँ पसलमा लुटपाट भएको छ। आन्दोलनका कारण व्यवसायमा ठूलो क्षति पुगेको र अर्थतन्त्रमा दबाब बढेको छ।

राष्ट्रिय सभाकी अध्यक्ष याएल ब्राउन–पिभेटले दंगाको योजना कसरी बनाइयो भनेर संसदीय छानबिन गर्ने प्रस्ताव गर्नुभएको छ।