एआईको सहायताले नेपोलियनको दुई सय वर्ष पुरानो गोप्य सन्देश पढियो

२०० वर्षभन्दा लामो समयदेखि नपढिएको नेपोलियन बोनापार्टको युद्धकालीन गोप्य सन्देश कृत्रिम बौद्धिकता अर्थात् एआईको सहयोगले खोलिएको छ। फ्रान्सेली सेनाका एक जनरललाई सन् १८०९ मा पठाइएको सो सन्देशमा प्रतीक, अंक र अक्षर मिसाइएका दुई दर्जन पङ्क्ति थिए। अनलाइन शैक्षिक अभिलेखमा बेवास्तामा परेको यो सङ्केत खोल्ने श्रेय अमेरिकी एआई इन्जिनियर कार्टर चर्चलाई गएको छ।

साइबर सुरक्षा कम्पनी सेन्टिनेलवनमा काम गर्ने २७ वर्षीय चर्चले च्याटजीपीटी बनाउने ओपनएआईको पछिल्लो मोडेल प्रयोग गरी ६ घण्टामै अर्थ पत्ता लगाएका थिए। पुरानो विधिबाट यो काम गर्दा हप्तौँ लाग्ने उनले बताएका छन्। उनले सङ्केत खोल्ने प्रविधि वा त्यस कालको इतिहासबारे धेरै ज्ञान आवश्यक नपरेको बताएका छन्।

यो घटनाले पुराना अभिलेखका रहस्य खोल्ने काम अब विद्वान् र अनुभवी सङ्केतविद्को मात्र नरहेको देखाएको छ।