जोकोभिच चाइना ओपनको फाइनलमा

चाइना ओपन टेनिसमा सर्बियाका नोभाक जोकोभिच फाइनलमा पुगेका छन्। सोमबार भएको सेमिफाइनलमा रुसका डानिल मेडभेडेभविरुद्ध ३९ वर्षीय जोकोभिचले पहिलो सेट ७–५ ले जितेका थिए। दोस्रो सेटमा ५–३ ले अगाडि रहेका जोकोभिच खेल टुंग्याउन सर्भ गर्दै थिए र त्यस गेमको स्कोर १५–१५ थियो।

त्यसै क्रममा मेडभेडेभले आउट भइसकेको बल दर्शकदीर्घातर्फ हानेपछि उनलाई डिफल्ट गर्दै खेलबाट अयोग्य घोषित गरिएको छ। यही निर्णयका कारण खेल पूरा नहुँदै जोकोभिचले फाइनलमा स्थान पक्का गरेका हुन्। उपाधिका लागि जोकोभिचले अस्ट्रेलियाका एलेक्स डे मिनोरको सामना गर्नेछन्।

चाइना ओपन एटीपी ५०० स्तरको प्रतियोगिता हो। जोकोभिचले यो प्रतियोगिता यसअघि ६ पटक जितिसकेका छन्। उनले अन्तिम पटक सन् २०१५ को फाइनलमा राफायल नाडाललाई हराएर उपाधि उचालेका थिए।