नेसन्स लिग: फ्रान्सले बेल्जियम र इटालीले टर्कीलाई हरायो

युइएफए नेसन्स लिग फुटबलको समूह 'ए' मा फ्रान्सले बेल्जियमलाई ४–१ र इटालीले टर्कीलाई ३–१ गोलले पराजित गरेका छन्। फ्रान्सविरुद्ध ३५औँ मिनेटमा डोडी लुकेबाकियोले गोल गरेर बेल्जियमलाई अग्रता दिलाएका थिए। पहिलो हाफ १–० ले पछि परेको फ्रान्सले खेलको अन्तिम चरणमा करिब १४ मिनेटको अवधिमा लगातार चार गोल गरेको छ।

७७औँ मिनेटमा डेजिरे डुएले बराबरी गोल गरे भने ८१औँ मिनेटमा रायन चर्कीले फ्रान्सलाई अग्रता दिलाए। माइकल ओलिसेले ८८औँ मिनेट र इन्जुरी समयमा गरी दुई गोल गरेका छन्। समूह चरणको चौथो खेलमा पाएको यो जितपछि फ्रान्स समूहको शीर्षमा पुगेको छ भने बेल्जियम तेस्रो स्थानमा छ।

अर्को खेलमा घरेलु टोली इटालीका लागि २६औँ मिनेटमा जियानलुका स्कामाकाले पहिलो गोल गरेका थिए। ६१औँ मिनेटमा अराल सिमशिरले गोल गर्दै टर्कीलाई बराबरीमा फर्काएका थिए। तीन मिनेटपछि ६४औँ मिनेटमा रिकार्डो कालाफियोरीले इटालीलाई फेरि अग्रता दिलाए।

८७औँ मिनेटमा पियो एस्पोसितोले तेस्रो गोल थपेर इटालीको जित पक्का गरे। इटाली र टर्कीबीचको खेल पनि समूह चरणको चौथो खेल थियो। यस जितसँगै इटाली समूह तालिकाको दोस्रो स्थानमा उक्लिएको छ भने पराजित टर्की चौथो स्थानमै सीमित भएको छ।