बाढीपीडित विद्यार्थीलाई छात्रवृत्ति, राष्ट्रियसभा समितिले ४९ वडाको क्षति विवरण माग्यो

भदौको भोटेकोशी बाढीबाट प्रभावित विद्यार्थीका लागि निजी विद्यालयका पाँच संस्थाले घोषणा गरेको छात्रवृत्तिलाई सरकारले ‘सुनिश्चित भविष्य छात्रवृत्ति योजना’ नाम दिएको छ। घोषणाअनुसार करिब १ अर्ब रुपैयाँ बराबरको यो छात्रवृत्ति झन्डै १ हजार विद्यार्थीलाई दिइनेछ। बाढीले रसुवा, नुवाकोट र धादिङका हजारौँ विद्यार्थी प्रभावित भएका छन्।

यसैबीच, राष्ट्रियसभाको भोटेकोशी एवं कालीगण्डकी करिडोर विपद्सम्बन्धी अध्ययन तथा अनुगमन समितिले कृषि, वन तथा पर्यावरण मन्त्रालयसँग प्रभावित ४९ वटै वडाको क्षतिको छुट्टाछुट्टै प्रमाणित विवरण माग गरेको छ। समितिका सभापति कृष्णप्रसाद पौडेलले स्थलगत निरीक्षणअघि नै सबै वडाको क्षतिको तथ्याङ्क चाहिने बताउनुभएको छ। मन्त्रालयका सचिव डा.

राजेन्द्रप्रसाद मिश्रले बालीको क्षति, विगतको उत्पादकत्व र चालु बजार मूल्यका आधारमा कृषि क्षति गणना भइरहेको जानकारी दिनुभएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सङ्कटग्रस्त तीन जिल्लाका करिब ५ हजार २ सय घरधुरीलाई प्रतिपरिवार ४५ हजार रुपैयाँ जीविकोपार्जन सहायता वितरण भएको छ। दोस्रो किस्ता तिहारअघि नै दिने प्राधिकरणले जनाएको छ।

तर लाभग्राही पहिचान, दर्ता र प्रमाणीकरण ढिलो हुँदा धेरै पीडितले न्यूनतम सहायता समयमै नपाएको गुनासो छ। अधिकांश विस्थापित अझै होल्डिङ सेन्टरमै बसिरहेका छन्।