आईजीपी कार्कीको निर्देशन: नागरिक सेवामा समर्पित हुनू

प्रहरी महानिरीक्षक दानबहादुर कार्कीले तिहार, नेपाल संवत्, छठ र ल्होसारलगायत आउँदा चाडपर्वमा सुरक्षा व्यवस्था प्रभावकारी बनाउन देशभरका प्रहरी कार्यालय प्रमुखलाई निर्देशन दिनुभएको छ। प्रहरी प्रधान कार्यालयबाट भर्चुअल माध्यममा गरिएको सम्बोधनमा उहाँले नागरिकका गुनासो सम्बोधन गर्दै सेवामा पूर्ण रूपमा समर्पित हुन आग्रह गर्नुभएको छ। चाडपर्वका बेला हुनसक्ने लुटपाट, चोरीजस्ता आपराधिक गतिविधि रोक्न विशेष सुरक्षा योजनासहित प्रहरी परिचालन गर्न उहाँले भन्नुभएको छ।

सवारी दुर्घटना घटाउन सरोकारवाला निकायसँग समन्वय गरी सवारीसाधनको यान्त्रिक अवस्था जाँच्न पनि निर्देशन दिइएको छ। मादक पदार्थ वा लागुऔषध सेवन गरी गाडी चलाउने, ओभरलोड र ट्राफिक नियम मिच्नेमाथि कडाइ गर्न पनि उहाँले भन्नुभएको छ। दसैँको सुरक्षा अवस्था सवारी दुर्घटनाबाहेक सन्तोषजनक रहे पनि कमजोरी देखिएका ठाउँमा सुधार गर्नुपर्ने उहाँको भनाइ छ।

सहभागी एक अधिकृतका अनुसार उहाँले संगठनभित्रैबाट आफूविरुद्ध हल्ला फैलाउने प्रवृत्तिप्रति कडा असन्तुष्टि जनाउनुभएको छ। त्यस्ता व्यक्तिमाथि विभागीय कारबाही हुने चेतावनी पनि उहाँले दिनुभएको छ।