मलेसिया रोजगारीबारे भ्रामक सूचना नफैलाउन श्रम मन्त्रालयको आग्रह

श्रम, रोजगार तथा सामाजिक सुरक्षा मन्त्रालयले मलेसियामा नेपाली कामदार पठाउनेबारे सञ्चारमाध्यम र सामाजिक सञ्जालमा फैलिएका तथ्यहीन सूचना प्रवाह नगर्न सबैसँग आग्रह गरेको छ। मन्त्रालयले बुधबार जारी गरेको विज्ञप्तिमा मलेसिया रोजगारीबारे यथार्थमा आधारित सूचना मात्र सम्प्रेषण गर्न सबै सरोकारवालालाई अनुरोध गरिएको छ। वैदेशिक रोजगारीजस्तो संवेदनशील विषयमा पुष्टि नभएका सूचनाले नागरिक र सरोकारवालालाई अन्योलमा पार्न सक्ने मन्त्रालयको भनाइ छ।

मन्त्रालयका अनुसार यस विषयमा मलेसिया सरकारका सम्बन्धित निकायसँग कूटनीतिक संवाद निरन्तर चलिरहेको छ। वैदेशिक रोजगार ऐन र नियमावली, द्विपक्षीय श्रम सम्झौता तथा अन्तर्राष्ट्रिय कानुनको दायराभित्र रहेर संवाद भइरहेको मन्त्रालयले स्पष्ट पारेको छ। दुवै देशबीचको वार्ताबाट यो विषय छिट्टै टुङ्ग्याउने पक्षमा सरकार रहेको विज्ञप्तिमा उल्लेख छ।

संविधान, प्रचलित कानुन र श्रम सम्झौताविपरीतको प्रणालीले कामदारको दीर्घकालीन हित जोगाउन नसक्ने मन्त्रालयको धारणा छ। नेपाल र मलेसिया दुवै सरकारले मान्ने पारदर्शी तथा निष्पक्ष कामदार भर्ना पद्धति विकास गर्न नेपाल सकारात्मक रहेको मन्त्रालयले जनाएको छ। मलेसियातर्फको श्रम आप्रवासन व्यवस्थित, पारदर्शी र दुवै देशको हितअनुकूल बनाउने सरकारको प्रतिबद्धता विज्ञप्तिमा दोहोर्‍याइएको छ।

तर विज्ञप्तिमा यो विषय कहिलेसम्म टुङ्गिन्छ भन्ने समयसीमा खुलाइएको छैन।