जुम्लामा मार्सी धान पाक्न थाल्यो, चामलको माग बढ्दो

कर्णाली प्रदेशको जुम्लामा गत जेठमा रोपिएको रैथाने मार्सी धान पाक्न थालेको छ र धानका फाँटहरू पहेँलै देखिन थालेका छन्। यस याममा मार्सीका साथै अन्य जातका धानले पनि खेतबारी पहेँलपुर बनेका छन्। देश र विदेशमा मार्सी चामलको माग बढ्दै गएको कृषि विकास कार्यालय जुम्लाका प्रमुख रामभक्त अधिकारीले बताउनुभएको छ।

कार्यालयका अनुसार जिल्लामा करिब २ हजार ८८८ हेक्टरमा धान खेती हुन्छ। त्यसमध्ये करिब १ हजार ६८ हेक्टर, अर्थात् झन्डै ३७ प्रतिशत क्षेत्रमा जुम्ली मार्सी लगाइन्छ। मार्सी धानको संरक्षण र प्रवर्द्धन प्रदेश सरकारको प्राथमिकतामा परेको छ।

प्राङ्गारिक खेती, रैथाने बालीको विकास र संरक्षणका लागि प्रदेश कृषि मन्त्रालयले करिब ८ लाख ५० हजार रुपैयाँ छुट्याएको अधिकारीले जानकारी दिनुभएको छ। प्रधानमन्त्री कृषि आधुनिकीकरण परियोजनाबाट पनि मार्सी धान ब्लक विकासका लागि करिब ८ लाख रुपैयाँ प्राप्त भएको छ।