शिक्षा सुधार: विश्वविद्यालय म्यापिङ, १०९ सामुदायिक विद्यालयमा पूर्वाधार, विद्यालय शिक्षा विधेयकको मस्यौदा

शिक्षा तथा खेलकुदमन्त्री सस्मित पोखरेलले विश्वविद्यालयहरूको नक्साङ्कन र विद्यालयको भौतिक पूर्वाधार मूल्याङ्कन तीव्र गतिमा अघि बढेको बताउनुभएको छ। बागमती विश्वविद्यालयले हेटौँडामा आयोजना गरेको उच्च शिक्षा प्रणाली सुदृढीकरणसम्बन्धी दुईदिने गोष्ठीको उद्घाटन गर्दै उहाँले यस्तो बताउनुभएको हो। आवश्यकतामा आधारित लगानी गरेर विश्वविद्यालयमा हुने दोहोरो लगानी रोक्ने सरकारको योजना रहेको मन्त्री पोखरेलको भनाइ छ।

नयाँ विश्वविद्यालय खोल्दा भूगोलको आवश्यकता, औचित्य र त्यस क्षेत्रले खोजेको रोजगारीलाई आधार बनाउनुपर्नेमा उहाँले जोड दिनुभएको छ। चलाउन नसकिने विश्वविद्यालयमा राज्यको लगानी नहुने पनि उहाँले बताउनुभएको छ। विश्वविद्यालय अनुदान आयोगको भूमिका तथा सङ्घ र प्रदेशका विश्वविद्यालयको आपसी सम्बन्धमा रहेको अन्योल हटाउनुपर्ने उहाँको भनाइ छ।

यसैबीच, शिक्षा मन्त्रालयले दुई हजारभन्दा बढी विद्यार्थी पढ्ने देशभरका १०९ सामुदायिक विद्यालयको पूर्वाधार सुदृढ गर्न करिब ६ अर्ब ५४ करोड रुपैयाँ छुट्याएको जनाएको छ। पहिलो चरणमा ८९ विद्यालयका लागि करिब ५ अर्ब ३४ करोड रुपैयाँ निकासा भइसकेको छ। प्रतिविद्यालय करिब ६ करोड रुपैयाँ लागतमा प्रयोगशाला र पुस्तकालयसहितको १२ कोठे तीनतले भवन बन्ने मन्त्री पोखरेलले बताउनुभएको छ।

मन्त्रालयले विद्यालय शिक्षा विधेयकको मस्यौदालाई अन्तिम रूप दिने काम पनि तीव्र पारेको छ। चालु आर्थिक वर्ष २०८३/८४ मा संसद्मा पेस हुने १६६ विधेयकको सूचीमा यो विधेयक प्राथमिकतामा परेको छ। प्रदेशस्तरीय छलफलबाट आएका सुझावका आधारमा कार्यतालिकाअनुसार तर्जुमाको काम भइरहेको मन्त्रालयका प्रवक्ता श्रीप्रसाद भट्टराईले बताउनुभएको छ।