नेपाली मूलका अस्ट्रेलियाली प्रहरी विकास भारतीलाई राष्ट्रिय वीरता पुरस्कार

नेपाली मूलका अस्ट्रेलियाली प्रहरी सिनियर कन्स्टेबल विकास भारतीले अस्ट्रेलियाको प्रतिष्ठित राष्ट्रिय वीरता पुरस्कार प्राप्त गर्नुभएको छ। पुलिस फेडेरेसन अफ अस्ट्रेलियाले बुधबार क्यानबेरामा आयोजित समारोहमा उहाँलाई यो सम्मान प्रदान गरेको हो। प्रधानमन्त्री एन्थोनी अल्बानीजले सङ्घीय संसदमा भारतीको साहस र कर्तव्यनिष्ठाको प्रशंसा गर्नुभएको छ।

भारती न्यु साउथ वेल्स प्रहरीअन्तर्गत ब्यारेनजोई प्रहरी क्षेत्र कमान्डमा कार्यरत हुनुहुन्छ। सन् २०२५ अक्टोबर ५ मा सिड्नीको क्रोइडन पार्कमा सार्वजनिक स्थानमा गोली चलेको घटनास्थलमा पुग्ने पहिलो प्रहरीमध्ये उहाँ हुनुहुन्थ्यो। गोली प्रहार भइरहेकै बेला उहाँले आफ्ना कनिष्ठ सहकर्मीलाई सुरक्षित ठाउँमा पठाउनुभएको र एक सर्वसाधारणलाई उद्धार गर्नुभएको थियो।

भारती सन् २०१५ मा नेपालबाट अस्ट्रेलिया जानुभएको हो। यो देशमा आउँदा यस्तो सम्मान पाउने कल्पनासमेत नगरेको र यो आफ्ना लागि गर्वको विषय भएको भारतीले बताउनुभएको छ। प्रहरीको काम कहिल्यै एक्लो प्रयास नहुने भन्दै उहाँले घटनाका बेला साथ दिने सहकर्मीको सहयोग, तालिम र विश्वासले नै साहस सम्भव भएको बताउनुभयो।

आफूलाई स्वागत गर्ने र योगदान गर्ने अवसर दिने देश र समुदायको सेवा गर्न पाउनु सौभाग्य भएको उहाँको भनाइ छ। न्यु साउथ वेल्स प्रहरी आयुक्त मल ल्यानियनले भारतीले आफ्नो ज्यानको पर्वाह नगरी असाधारण बहादुरी देखाएको बताउनुभएको छ।