चिनियाँ कम्युनिस्ट पार्टीले भित्री अनुशासन कडा पार्ने निर्णय

चीनको सत्तारूढ कम्युनिस्ट पार्टीले आफ्नो सङ्गठनभित्र अनुशासन अझ कडा बनाउने निर्णय गरेको छ। राष्ट्रपति सी जिनपिङको नेतृत्वमा बिहीबार बेइजिङमा सम्पन्न केन्द्रीय समितिको पाँचौँ पूर्ण बैठक अर्थात् प्लेनमले यस्तो निर्णय गरेको हो। सिन्ह्वा समाचार एजेन्सीका अनुसार निर्णयमा कार्यकर्ताबीचको भ्रष्टाचार नियन्त्रणलाई पनि समेटिएको छ, तर उपायहरूको विस्तृत विवरण सार्वजनिक गरिएको छैन।

बैठकको आधिकारिक वक्तव्यमा पार्टीले लामो समयदेखि नियन्त्रणबाहिर रहेका अस्वस्थ प्रवृत्ति रोकेको र पार्टी, राज्य तथा सेनाभित्रका लुकेका गम्भीर खतरा हटाएको उल्लेख गरिएको छ। पार्टीको केन्द्रीय समितिमा करिब ३०० सदस्य छन्, तर बैठकअघि आठवटा सिट रिक्त थिए। सीले झन्डै १४ वर्षदेखि चलाएको भ्रष्टाचारविरोधी अभियानमा हजारौँ अधिकारी पदबाट हटाइएका छन्, जसमा दर्जनौँ केन्द्रीय समिति सदस्य पनि छन्।

यही कारण यस वर्षको बैठकमा सन् १९७६ यताकै सबैभन्दा कम उपस्थिति रहेको बताइएको छ। बैठकले भ्रष्टाचारविरोधी प्रमुख तथा केन्द्रीय सैन्य आयोगका उपाध्यक्ष चाङ सेङमिनलाई देशको सर्वोच्च निर्णायक निकाय पोलिटब्युरोमा बढुवा गरेको छ। उहाँको बढुवापछि पोलिटब्युरोका सदस्य सङ्ख्या २२ पुगेको छ।

आधिकारिक वक्तव्यमा सीलाई 'जननेता' उपाधि भने दिइएको छैन। एसओएएस चीन संस्थानका निर्देशक स्टिभ साङले एएफपीसँग कुरा गर्दै यो बैठकलाई अर्को वर्ष हुने पार्टीको २१औँ महाधिवेशनमा सीको अर्को कार्यकालको तयारीका रूपमा व्याख्या गर्नुभएको छ।