टिकटकले तीन महिनामा नेपालबाट २० लाखभन्दा बढी भिडियो हटायो

सामाजिक सञ्जाल टिकटकले यस वर्ष अप्रिलदेखि जुनसम्मको तीन महिनामा नेपालबाट करिब २० लाख ३६ हजार भिडियो हटाएको जनाएको छ। कम्पनीले बिहीबार सार्वजनिक गरेको त्रैमासिक प्रतिवेदनअनुसार ती भिडियोले सामुदायिक मापदण्ड उल्लङ्घन गरेका थिए। हटाइएका भिडियो सो अवधिमा नेपालबाट टिकटकमा राखिएका कुल भिडियोको करिब ०.४ प्रतिशत हुन्।

तीमध्ये झन्डै ९९.५ प्रतिशत भिडियो कसैले उजुरी गर्नुअघि नै पहिचान गरेर हटाइएको प्रतिवेदनमा उल्लेख छ। नियम तोड्ने करिब ९२.३ प्रतिशत भिडियो २४ घण्टाभित्रै हटाइएको टिकटकले जनाएको छ। पुनः समीक्षापछि करिब ३३ हजार ५०० भिडियो फेरि फिर्ता ल्याइएका छन्।

विश्वभर भने टिकटकले सोही अवधिमा करिब १८ करोड ८३ लाख भिडियो हटाएको छ, जुन प्लेटफर्ममा राखिएका कुल सामग्रीको झन्डै ०.५ प्रतिशत हो। तीमध्ये करिब १८ करोड ३३ लाख भिडियो स्वचालित पहिचान प्रविधिको सहायताले हटाइएका छन्।