एमाले महासचिव पोखरेल र सचिव बस्नेतको सरकारमाथि आलोचना

नेकपा एमालेका महासचिव शंकर पोखरेलले सरकारले निजामती प्रशासनलाई मन्त्रीको आदेश मान्ने कठपुतलीमा सीमित गर्न खोजेको आरोप लगाउनुभएको छ। एमाले बागमती प्रदेश कमिटीले शनिबार काठमाडौँमा आयोजना गरेको कार्यक्रममा उहाँले स्थायी सरकार मानिने प्रशासन कानुनअनुसार चल्नुपर्ने बताउनुभयो। प्रधानमन्त्री र मन्त्रीहरूले कर्मचारीलाई अनावश्यक निर्देशन मान्न दबाब दिएको उहाँको आरोप छ।

निजामती कर्मचारीको अवकाश उमेर ५५ वर्ष बनाउने गरी कानुनको मस्यौदा अघि बढाइएकाले कर्मचारीमा अन्योल र त्रास फैलिएको उहाँको दाबी छ। मानिसको औसत आयु बढ्दै गएका बेला अवकाश उमेर घटाउनु गलत भएको पोखरेलको भनाइ छ। निर्वाचनबाट दुई तिहाइको सरकार बने पनि छ महिनामै सुशासन र सेवा प्रवाहका प्रतिबद्धताबाट पछि हटेको आरोप पनि उहाँले लगाउनुभएको छ।

अनलाइनमा पुगिसकेका केही सेवा फेरि कागजमा फर्काइएको र विद्युतीय बोलपत्र प्रणालीसमेत कागजी प्रक्रियामा लैजाने तयारी भएको उहाँले बताउनुभयो। छिमेकी मुलुकसँगको सम्बन्ध बिग्रिए सार्वभौमसत्तामा असर पर्ने चेतावनी पनि पोखरेलले दिनुभएको छ। सोही कार्यक्रममा एमाले सचिव महेश बस्नेतले खाद्य सामग्रीको मूल्य २०० प्रतिशतभन्दा बढी बढेको दाबी गर्नुभएको छ।

दसैँ, तिहार र छठ नजिकिँदै गर्दा महँगीका कारण धेरै नागरिक सहज रूपमा चाड मनाउन नसक्ने अवस्थामा पुगेको उहाँको भनाइ छ। ग्यास अभावका कारण उपभोक्ता अझै लाइनमा बस्नुपरेको पनि बस्नेतले बताउनुभएको छ।