मौसम सुधारिएपछि धौलागिरि आरोहण पुनः सुरु

म्याग्दीको धौलागिरि हिमालमा मौसम खुलेपछि रोकिएको शरदकालीन आरोहण फेरि सुरु भएको छ। विश्वको सातौँ अग्लो, ८ हजार १६७ मिटरको धौलागिरि धवलागिरि गाउँपालिका–४ मुदीमा पर्छ। असोज ८ देखि ११ गतेसम्म लगातार परेको वर्षा र भारी हिमपातले आधार शिविर हिउँले पुरिएपछि आरोहण स्थगित गरिएको थियो।

सेभेन समिट ट्रेकका प्रबन्ध निर्देशक थानेश्वर गुरागाईंका अनुसार कम्पनीका नेपाली र विदेशी गरी १४ जनालाई त्यतिबेला हेलिकप्टरमार्फत उद्धार गरी असोज ८ गते पोखरा ल्याइएको थियो। मौसम अनुकूल भएपछि अक्टोबर १ मा पोखराबाट फेरि हिँडेको टोली आधार शिविर हुँदै अहिले चुचुरोतर्फ उक्लिरहेको छ। बाटो सुरक्षित बनाउन डोरी टाँग्ने टोली क्याम्प दुईभन्दा करिब ४०० मिटर माथि पुगेको उहाँले बताउनुभएको छ।