मूर्तिकार स्व. कालु कुमालेलाई मरणोपरान्त ग्लोबल अवार्ड

नेपाली परम्परागत मूर्तिकलाका वरिष्ठ कलाकार कालु कुमालेलाई मरणोपरान्त ‘ग्लोबल अवार्ड’ प्रदान गरिने भएको छ। शनिबार ललितपुरमा आयोजित स्मृति कार्यक्रममा इन्फिनिटी सर्भिस संस्थाले यसबारे जानकारी दिएको हो। संस्थाका अनुसार पुरस्कार वितरण समारोह नोभेम्बर १ तारिखमा हुनेछ।

विसं १९९० जेठ २७ गते ललितपुरको ऐतिहासिक ओकुबाहलमा जन्मनुभएका कुमाले देशकै पहिलो ललितकला उपाधि पाउने कलाकार हुनुहुन्थ्यो र उहाँलाई ‘क्रोधकला शिरोमणि’ भनेर चिनिन्थ्यो। क्रोधमुद्राका रौद्र रूपका मूर्ति बनाउनमा दक्ष उहाँले नेपाली परम्परागत मूर्तिकलालाई अन्तर्राष्ट्रिय मञ्चमा चिनाउन महत्त्वपूर्ण भूमिका खेल्नुभएको थियो। उहाँका कलाकृति विसं २०१८ मै बेलायतको भिक्टोरिया एन्ड अल्बर्ट सङ्ग्रहालयमा पुगेका थिए।

उहाँले जीवनकालमा ६०० भन्दा बढी मूर्ति बनाउनुभएको थियो र ती कलाकृति ५५ भन्दा बढी देशमा पुगेका छन्। चतुर्भुज भैरव, बाराही, गणेश भैरव, अष्टमातृका, वज्र र नागदेवताका मूर्ति उहाँका सिर्जनामा पर्छन्।