युद्धविरामको एक वर्षपछि पनि गाजामा भोकमरीको सङ्कट

इजरायल र हमासबीच युद्धविराम भएको एक वर्ष पुग्दा पनि गाजामा खाद्य सङ्कट गम्भीर नै रहेको छ। संयुक्त राष्ट्रसङ्घीय विश्व खाद्य कार्यक्रमका शन ह्युजेसका अनुसार गाजाको खाद्य सुरक्षा अवस्था अझै अत्यन्त नाजुक छ। जुलाईको तथ्याङ्कअनुसार करिब २१ लाख जनसङ्ख्यामध्ये झन्डै १४ लाख मानिस चरम खाद्य असुरक्षामा छन्।

तीमध्ये करिब दुई लाख मानिस भोकमरीभन्दा एक तह मात्र माथि छन्। राष्ट्रसङ्घ समर्थित खाद्य सुरक्षा वर्गीकरण प्रणाली आइपीसीले अगस्त २०२५ मा गाजामा अनिकाल घोषणा गरेको थियो। इजरायलले त्यो निष्कर्ष अस्वीकार गरेको थियो भने आपूर्ति बढेपछि डिसेम्बरमा घोषणा फिर्ता लिइएको थियो।

इजरायली रक्षा मन्त्रालयअन्तर्गतको निकाय कोगाटले भने गाजाको मानवीय अवस्था स्थिर रहेको जनाएको छ। खाद्य सहायता भित्रिए पनि फलफूल, ताजा तरकारी र प्रोटिनयुक्त खानाको अभाव कायमै छ। फ्रान्सेली सहायता संस्था मेडिसिन्स दु मोन्डले बिहीबार सार्वजनिक गरेको अध्ययनअनुसार गर्भवती तथा स्तनपान गराइरहेका महिलामध्ये करिब १७ प्रतिशतले मात्र पर्याप्त विविधतायुक्त आहार पाएका छन्।

खान युनिसको पालमा बस्ने ३५ वर्षीया नियाहा अल–मासरी आठ छोराछोरीसहितको १० सदस्यीय परिवारका लागि दिनहुँ सामुदायिक भान्सामा घण्टौँ लाइन बस्छिन्। सहायता संस्थाले चलाएको त्यही भान्साको खाना नै परिवारको दिनभरको एकमात्र छाक हो। तीनदेखि १४ वर्षसम्मका उनका छोराछोरी फलफूल खान चाहन्छन्, तर परिवारसँग किन्ने पैसा छैन।