पोखराका दुवै विमानस्थल आसपास चङ्गा, ड्रोन र लेजर बत्तीमा रोक

पोखरा अन्तर्राष्ट्रिय विमानस्थल र पुरानो पोखरा विमानस्थल आसपासका क्षेत्रमा चङ्गा, ड्रोन र बेलुन उडाउन तथा लेजर बत्ती बाल्न रोक लगाइएको छ। पोखरा अन्तर्राष्ट्रिय विमानस्थलका प्रमुख जगन्नाथ निरौलाका अनुसार उडान तथा अवतरणको सुरक्षामा गम्भीर जोखिम हुने भएकाले सार्वजनिक सूचना जारी गरिएको छ। विमानस्थल वरिपरि जथाभावी फोहोर फाल्ने र नहरमा मरेका पशुपन्छी बगाउने कामले पनि हवाई सुरक्षामा जोखिम निम्त्याउने सम्बन्धित निकायले जनाएको छ।

त्यस्ता फोहोरले चराचुरुङ्गी र अन्य वन्यजन्तुको चहलपहल बढाउन सक्छ। उडान वा अवतरणका बेला चरा विमानसँग ठोक्किए दुर्घटनाको जोखिम बढ्ने भएकाले फोहोर र मरेका जनावर व्यवस्थित ढङ्गले हटाउन सर्वसाधारणसँग आग्रह गरिएको छ। सूचना नमानी यस्ता गतिविधि गर्नेलाई प्रचलित कानुनबमोजिम कडा कारबाही हुने विमानस्थलको नागरिक उड्डयन कार्यालयले चेतावनी दिएको छ।

जल तथा मौसम विज्ञान विभागका अनुसार आज पोखरामा मेघगर्जनसहित हल्का वर्षाको पूर्वानुमान छ र वर्षाको सम्भावना २० प्रतिशत छ।