शरणार्थी फिर्ती विवादबीच म्यानमारका सैन्य नेता मलेसियामा

म्यानमाको सैन्य–समर्थित सरकारका नेता मिन आङ ह्लाइङ बुधबार वार्ताका लागि मलेसिया पुग्नुभएको छ। मलेसियाले म्यानमाली नागरिकलाई स्वदेश फर्काउन थालेको विषयमा अन्तर्राष्ट्रिय आलोचना भइरहेका बेला यो भ्रमण भएको हो। उहाँ पुग्नुभन्दा चार दिनअघि मलेसियाबाट करिब १ हजार ५०० म्यानमाली नागरिक स्वदेश फर्काइएका थिए।

मलेसियाका अनुसार चरणबद्ध रूपमा फर्कन सहमत हुनेको सङ्ख्या करिब ५ हजार पुगेको छ। संयुक्त राष्ट्रसङ्घीय शरणार्थी उच्चायुक्तको कार्यालय र अधिकारवादी समूहहरूले यो प्रक्रियाको आलोचना गरेका छन्। उनीहरूका अनुसार फर्किनेहरूले म्यानमामा हिंसा, उत्पीडन र जबर्जस्ती सैन्य भर्तीको जोखिम झेल्न सक्छन्।

मलेसियाको गृह मन्त्रालयका अनुसार अगस्टको अन्त्यसम्म अध्यागमन हिरासत केन्द्रहरूमा झन्डै १२ हजार म्यानमाली नागरिक थिए। युएनएचसिआरको दर्ताअनुसार मलेसियामा करिब २ लाख १५ हजार शरणार्थी तथा शरण खोज्ने व्यक्ति छन्, जसमध्ये करिब १ लाख २६ हजार रोहिङ्ग्या हुन्। फर्काइनेमा रोहिङ्ग्या समुदायका मानिस छन् वा छैनन् भन्ने खुलेको छैन।

मलेसियाले संयुक्त राष्ट्रसङ्घको शरणार्थी महासन्धिमा हस्ताक्षर गरेको छैन। सन् २०२१ मा सेनाले सत्ता कब्जा गरेपछि आसियानले म्यानमाका सैन्य नेतालाई उच्चस्तरीय बैठकबाट टाढा राख्दै आएको छ। म्यानमाको विदेश मन्त्रालयका अनुसार मिन आङ ह्लाइङले लगानी र आर्थिक सहयोग बढाउने उद्देश्यको व्यापारिक संवादलाई सम्बोधन गर्नुभएको छ।

उहाँले बिहीबार मलेसियाका प्रधानमन्त्री अनवर इब्राहिमसँग भेटवार्ता गर्ने कार्यक्रम छ।