इन्धन मूल्य घटाउन आईईएले १० करोड ब्यारेल तेल बजारमा ल्याउने

अन्तर्राष्ट्रिय ऊर्जा एजेन्सी, आईईएका सदस्य राष्ट्रहरूले इन्धनको मूल्य घटाउन आपत्कालीन भण्डारबाट थप करिब १० करोड ब्यारेल तेल बजारमा ल्याउने निर्णयलाई समर्थन गरेका छन्। आईईएका कार्यकारी निर्देशक फातिह बिरोलले सदस्य सरकारहरूले मार्चमा गरिएको सामूहिक निर्णय पूरा गर्ने प्रतिबद्धता दोहोर्‍याएको जानकारी दिनुभएको छ। होर्मुज जलमार्ग बन्द भएपछि आपूर्ति खल्बलिँदा इन्धनको मूल्य बढिरहेको छ।

इरानमाथि अमेरिका र इजरायलको युद्धपछि उत्पन्न अवरोध सम्बोधन गर्न सदस्य राष्ट्रहरूले मार्चमा करिब ४० करोड ब्यारेल तेल निकाल्ने सहमति गरेका थिए। बिरोलका अनुसार त्यसमध्ये हालसम्म करिब ३२ करोड ५० लाख ब्यारेल बजारमा पुगिसकेको छ। प्रतिबद्धता जनाइएको तर अझै नल्याइएको बाँकी तेल निकाल्दा थप करिब १० करोड ब्यारेल उपलब्ध हुने उहाँले बताउनुभएको छ।

केही सदस्य राष्ट्रले सुरुमा वाचा गरेभन्दा धेरै तेल बजारमा पठाइसकेको पनि उहाँले उल्लेख गर्नुभएको छ। बिरोलका अनुसार सदस्य राष्ट्रसँग सार्वजनिक स्वामित्वको करिब १ अर्ब १० करोड ब्यारेल तेल र २० करोड ब्यारेलभन्दा बढी डिजेल अझै भण्डारमा छ। अमेरिकी राष्ट्रपति डोनाल्ड ट्रम्पले जी–७ राष्ट्रले बजारमा इन्धन नथपे अमेरिकी डिजेल निर्यात रोक्ने चेतावनी दिएपछि यो निर्णय आएको हो।

त्यसअघि शुक्रबार जी–७ राष्ट्रहरूले करिब १० करोड ब्यारेल तेल बजारमा ल्याउन सहमति जनाएका थिए।