इरान र स्विडेनबीच कूटनीतिज्ञ निष्कासनको तनाव

स्विडेनले स्टकहोमस्थित इरानी दूतावासका एक कर्मचारीलाई निष्कासन गरेपछि इरानले तेहरानस्थित एक स्विडेनी कूटनीतिज्ञलाई ४८ घण्टाभित्र देश छाड्न आदेश दिएको छ। इरानको विदेश मन्त्रालयले बिहीबार सरकारी टेलिभिजनमार्फत जारी गरेको विज्ञप्तिमा स्विडेनको निर्णय अनुचित र अन्तर्राष्ट्रिय कानुनविपरीत रहेको जनाएको छ। विरोध जनाउन तेहरानस्थित स्विडेनी राजदूतलाई मन्त्रालयमा बोलाइएको पनि विज्ञप्तिमा उल्लेख छ।

स्विडेनी अधिकारीले बुधबार इरानले लामो समयदेखि स्विडेनभित्र र स्विडेनविरुद्ध सुरक्षा खतरा निम्त्याउने गतिविधि सञ्चालन गर्दै आएको आरोप लगाएका थिए। उनका अनुसार ती गतिविधि इरानी सरकारका विरोधीलगायतलाई लक्षित थिए। दुई देशबीचको कूटनीतिक सम्बन्ध पछिल्ला केही वर्षदेखि तनावपूर्ण रहँदै आएको छ।