स्पेनमा नोभेम्बर २९ मा आमनिर्वाचन, प्रधानमन्त्री सान्चेजको घोषणा

स्पेनका प्रधानमन्त्री पेड्रो सान्चेजले आगामी नोभेम्बर २९ मा आमनिर्वाचन गराउने घोषणा गर्नुभएको छ। संसद्को कार्यकाल पूरा हुनुअघि नै उहाँले नयाँ जनादेश लिने निर्णय गर्नुभएको हो। सोमबार बिहान मोनक्लोवा प्यालेसबाट भिडियो सन्देश दिँदै उहाँले संसद् विघटन र निर्वाचन आह्वानका लागि सोही दिन असाधारण मन्त्रिपरिषद् बैठक बोलाउने बताउनुभएको छ।

गत शुक्रबार संसद्ले आवास सङ्कट घटाउने र भाडामा बस्नेको सुरक्षा बलियो बनाउने सरकारका दुई अध्यादेश अस्वीकार गरेपछि यो घोषणा आएको हो। ती अध्यादेशविरुद्ध पिपुल्स पार्टी, भोक्स र क्याटालान कन्जरभेटिभ दल जुन्ट्स पर क्याटालुन्याले मत दिएका थिए। प्रस्ताव अस्वीकृत हुँदा सान्चेज नेतृत्वको स्पेनी समाजवादी मजदुर पार्टीको गठबन्धन सरकार संसद्मा कमजोर रहेको थप स्पष्ट भएको छ।

कानुन पारित गर्न सरकार साना तथा क्षेत्रीय दलको समर्थनमा भर पर्दै आएको छ।