विश्व वित्तीय केन्द्र सूचकाङ्कमा हङकङ तेस्रो स्थानमा कायम

वित्तीय केन्द्रहरूको पछिल्लो विश्व सूचकाङ्कमा हङकङ तेस्रो स्थानमा कायम रहँदै एसिया–प्रशान्त क्षेत्रमा पहिलो बनेको छ। बेलायतको जेड/येन ग्रुप र चीनको शेन्जेनमा रहेको चाइना डेभलपमेन्ट इन्स्टिच्युटले बुधबार संयुक्त रूपमा 'ग्लोबल फाइनान्सियल सेन्टर्स इन्डेक्स (जीएफसीआई) ४०' सार्वजनिक गरेका छन्। प्रतिवेदनमा विश्वका झन्डै १२० वित्तीय केन्द्रको मूल्याङ्कन गरिएको उल्लेख छ।

फिनटेक सेवा र वित्तीय क्षेत्रको विकासमा हङकङ विश्वमै पहिलो स्थानमा पुगेको छ। मानव पुँजीमा दोस्रो स्थान जोगाएको हङकङ व्यावसायिक वातावरण तथा पूर्वाधारमा पनि दोस्रो भएको छ। विज्ञ तथा व्यवसायीहरूको मूल्याङ्कनअनुसार लगानी व्यवस्थापनमा हङकङ विश्वमै पहिलो भएको छ भने बीमा तथा वित्तीय क्षेत्रमा पनि उसले अग्रस्थान कायम राखेको छ।

हङकङ विशेष प्रशासनिक क्षेत्र सरकारका प्रवक्ताले स्थिरतामार्फत विकास र विकासमार्फत स्थिरताको नीतिलाई निरन्तरता दिँदै वित्तीय सुविधा विस्तार गरिने जनाएका छन्। वित्तीय क्षेत्रको प्रभाव र लाभ फराकिलो बनाउन 'फाइनान्स प्लस' अवधारणा अघि बढाइने उनले बताएका छन्। प्रवक्ताका अनुसार विश्वव्यापी अफसोर रेन्मिन्बी व्यापार केन्द्रका रूपमा हङकङले चीनको राष्ट्रिय विकास रणनीतिसँग तालमेल मिलाउँदै अफसोर रेन्मिन्बीको प्रयोग बढाउने उपाय प्रवर्द्धन गर्नेछ।

जीएफसीआई प्रतिवेदन सन् २००७ देखि वर्षमा २ पटक, मार्च र सेप्टेम्बरमा, प्रकाशित हुँदै आएको छ।