अडानीलाई उछिन्दै टिकटकका संस्थापक चाङ यिमिङ एसियाकै धनी

टिकटकको माउ कम्पनी बाइटडान्सका संस्थापक चाङ यिमिङले भारतीय उद्योगपति गौतम अडानीलाई उछिन्दै एसियामा पहिलो धनीको स्थान ओगटेका छन्। ब्लुमबर्ग बिलियनेयर्स इन्डेक्सअनुसार चाङको सम्पत्ति करिब १०५ अर्ब अमेरिकी डलर पुगेको छ भने अडानीको सम्पत्ति करिब १०४.८ अर्ब डलर रहेको छ। ब्लुमबर्गले ब्ल्याकरक, फिडेलिटी इन्भेस्टमेन्ट्स र टी रो प्राइसजस्ता लगानी कम्पनीको अद्यावधिक मूल्याङ्कन विश्लेषण गर्दा चाङको सम्पत्ति यसै महिना करिब १२ अर्ब डलरले बढेको देखिएको छ।

सन् २०१९ को मार्चमा ब्लुमबर्गले करिब १३ अर्ब डलर रेकर्ड गरेको उनको सम्पत्ति अहिले ८ गुणाभन्दा बढी भएको छ। अडानीको सम्पत्ति जुनमा करिब १२० अर्ब डलर पुगेको थियो, तर एमएससीआई सूचकाङ्कमा सेयर पुनर्सन्तुलन तथा तेलको महँगो मूल्य र बन्ड यिल्डका कारण भएको सेयर बिक्रीले घटेको ब्लुमबर्गले जनाएको छ। ४३ वर्षीय चाङले सन् २०१२ मा बाइटडान्स स्थापना गरेका थिए।

कम्पनीले टिकटक, डोयिन र कृत्रिम बुद्धिमत्तासम्बन्धी व्यवसाय फैलाउँदै लगेको छ।