नेपाल–मलेसिया संयुक्त कार्यदलको बैठक काठमाडौँमा गर्न सरकारको प्रस्ताव

नेपाल सरकारले नेपाली श्रमिकको छनोट तथा भर्ना प्रक्रियासँग सम्बन्धित विषयमा मलेसियासँग छलफल गर्न संयुक्त कार्यदल (ज्वाइन्ट वर्किङ ग्रुप–जेडब्लुजी) को बैठक काठमाडौँमा आयोजना गर्न प्रस्ताव गरेको छ।

नेपाल र मलेसियाबीच श्रमिक छनोट तथा भर्ना प्रक्रियामा देखिएका विषयलाई आपसी संवाद, सहकार्य र समझदारीका माध्यमबाट सम्बोधन गर्ने उद्देश्यले सरकारले यसका लागि कूटनीतिक पहल सुरु गरेको हो।

सरकारले उक्त बैठक नोभेम्बर वा डिसेम्बरमा नेपालमा गर्न प्रस्ताव गरेको छ। बैठकमा श्रमिक छनोट तथा भर्ना प्रक्रियामा देखिएका समस्या समाधानका विषयमा छलफल हुने भएको छ।

मलेसिया नेपाली श्रमिकका लागि प्रमुख गन्तव्यमध्ये एक हो। संयुक्त कार्यदलको बैठकमार्फत दुवै देशबीच देखिएका विषयमा समाधान खोज्ने सरकारको तयारी छ।