राष्ट्र बैंकले प्रचलनमा ल्यायो एक हजार रुपैयाँको नयाँ नोट

नेपाल राष्ट्र बैंकले एक हजार रुपैयाँ दरको नयाँ बैंकनोट प्रचलनमा ल्याएको छ। बैंकले बिहीबार सूचना निकालेर 'सिरिज २०२५' अन्तर्गतको यो नोट चलनचल्तीमा आएको जनाएको छ। नयाँ नोटको आकार पुरानै हजारको नोटजस्तै छ, तर रङ संयोजन र सुरक्षण विशेषतामा फेरबदल गरिएको छ।

वैजनी घेराभित्र फिक्का हरियो रङ देखिने यो नोटमा गभर्नर प्राध्यापक डाक्टर विश्वनाथ पौडेलको हस्ताक्षर छ। अगाडिपट्टि बायाँ भागमा सगरमाथाको चित्र छ भने दायाँ भागमा लालीगुराँसको आकृति र त्यसमुनि १००० अंक झल्किने पानीछाप छ। सगरमाथाको दायाँपट्टिको अण्डाकार आकृतिमा भगवतीको चित्र राखिएको छ।

उज्यालोमा राखेर हेर्दा नीलो सी-थ्रु रजिस्टरमा १००० अंक पूरै देखिन्छ। नक्कली नोट बनाउन कठिन होस् भनेर नोटका दुवैतर्फ विभिन्न सुरक्षण तथा पहिचानजन्य विशेषता राखिएका छन्। राष्ट्र बैंकको मुद्रा व्यवस्थापन विभागका अनुसार नयाँ नोटको सङ्केत नम्बर ट/९२ ०००००१ देखि त/५० ९९९९९९ सम्म छ।