ह्वाइट हाउसमा ट्रम्प–सी शिखर वार्ता, व्यापार र दुर्लभ खनिज केन्द्रमा

तीनदिने राजकीय भ्रमणमा वाशिङ्टन पुग्नुभएका चिनियाँ राष्ट्रपति सी जिनपिङ र अमेरिकी राष्ट्रपति डोनल्ड ट्रम्पबीच आज ह्वाइट हाउसमा वार्ता हुँदै छ। ज्वाइन्ट बेस एन्ड्र्युजमा राष्ट्रपति ट्रम्प र पत्नी मेलानिया ट्रम्पले सी र उहाँकी पत्नी पेङ लियुआनलाई स्वागत गर्नुभएको थियो। स्वागतमा करिब १०० फिट लामो रातो कार्पेट ओछ्याइएको थियो भने सीको विमान अवतरणपछि अमेरिकी सेनाका २ वटा बी–१ बमवर्षक विमानले आकाशमा उडान प्रदर्शन गरेका थिए।

वार्ताअघि नै दुवै देशले व्यापार युद्धविरामलाई २ महिना थपेर जनवरी १० सम्म पुर्‍याउन सहमति जनाएका छन्, यसअघि यो नोभेम्बर १० मा सकिने तय थियो। वार्तामा भन्सार महसुल, कृत्रिम बौद्धिकता, दुर्लभ खनिज, इरान युद्ध र ताइवानका विषय उठ्ने अपेक्षा छ। राष्ट्रिय सुरक्षामा जोखिम पुर्‍याउन सक्ने कृत्रिम बौद्धिकतासम्बन्धी घटनाबारे सूचना आदानप्रदान गर्ने संयन्त्रमा छलफल हुनसक्ने अमेरिकी अधिकारीहरूले बताएका छन्।

चीनले ताइवानलाई अमेरिकी हतियार बिक्री स्थायी रूपमा रोक्न र उन्नत अर्धचालक प्रविधिको निर्यातमा लगाइएको कडाइ खुकुलो पार्न माग गर्दै आएको छ। इरानमाथि प्रभाव प्रयोग गर्न अमेरिकाले दिएको दबाबलाई भने बेइजिङले मानेको छैन। बेन्चमार्क मिनरल इन्टेलिजेन्सका अनुसार सबैभन्दा बढी प्रयोग हुने २ दुर्लभ खनिजको अमेरिकी मागमध्ये करिब ४२ प्रतिशत मात्र स्वदेशी उत्पादनले धान्न सक्छ।