भारतले खानेतेलको भन्सार घटायो, नेपाली उद्योगलाई चुनौती

भारतले खानेतेल आयातमा लाग्ने आधारभूत भन्सार महसुलमा ठूलो कटौती गरेपछि नेपालका तेल प्रशोधन उद्योगबाट भारत जाने निर्यात प्रभावित हुने भएको छ। भारतको अर्थ मन्त्रालयअन्तर्गतको राजस्व विभागले बुधबार राजपत्रमा सूचना प्रकाशित गरेको थियो र नयाँ दर बिहीबारदेखि लागू भएको छ। राजपत्रअनुसार कच्चा सूर्यमुखी तेलको आधारभूत महसुल १० प्रतिशतबाट शून्यमा झारिएको छ।

कच्चा पाम र कच्चा भटमास तेलको महसुल १० बाट ५ प्रतिशत बनाइएको छ। प्रशोधित भटमास तेलको दर भने ३२.५ बाट घटेर २७.५ प्रतिशत पुगेको छ। भारतीय सञ्चारमाध्यमका अनुसार चाडपर्वमा उपभोक्तालाई सस्तो तेल दिन र महँगी घटाउन भारत सरकारले यो निर्णय गरेको हो।

खानेतेल आयातमा विश्वकै ठूलो मुलुक भारतले आफ्नो आवश्यकताको करिब दुई तिहाइ वनस्पति तेल मलेसिया, इन्डोनेसिया, अर्जेन्टिना, रुस र युक्रेनलगायत देशबाट ल्याउँछ। नेपालमा भने तीनै प्रकारका कच्चा तेलमा १० प्रतिशत महसुल लाग्छ। भारतमा कच्चा तेल नेपालभन्दा कम महसुलमा भित्रिने भएपछि अब प्रतिस्पर्धा गर्न नसकिने उद्योगीहरूले बताएका छन्।

यो कटौतीले नेपाली तेल उद्योगको उत्पादन घट्ने र रोजगारीमा असर पर्ने जोखिम बढेको छ।