बेत्रावतीको फलाखु खोलामा सेनाले बेलीब्रिज जडान सुरु गर्‍यो

नेपाली सेनाले नुवाकोट र रसुवाको सिमानामा पर्ने बेत्रावतीस्थित फलाखु खोलामा बेलीब्रिज जडान गर्न थालेको छ। बाढीले अवरुद्ध बनाएको सडक सम्पर्क फेरि सुचारु गर्न सेनाको इन्जिनियरिङ फौजबाट खटिएको टोलीले यो काम अघि बढाएको हो। पुल बन्ने ठाउँसम्म पुग्न टोलीले करिब ३०० मिटर सडकखण्डका कडा चट्टान फोडेर पहुँच मार्ग तयार पारेको थियो।

त्यसपछि करिब ६० टन भार थेग्न सक्ने झन्डै २४० फिट लामो एक्रो बेलीब्रिजका सामग्री असोज १९ गतेसम्म निर्माणस्थलमा पुर्‍याइएका थिए। ढुवानी सकिएलगत्तै असोज २० गतेदेखि पुलका भाग जोड्ने काम सुरु गरिएको हो। पुल तयार भएपछि बाढी प्रभावित नुवाकोट र रसुवाबीचको यातायात र आवागमन सहज हुने अपेक्षा गरिएको छ।

स्थानीय बासिन्दाको दैनिक आवतजावतसँगै खाद्यान्न, अत्यावश्यक वस्तु र राहत सामग्री ढुवानीमा पनि यसले सहजता ल्याउने विश्वास लिइएको छ। पुल जडानको काम चलिरहँदा जल तथा मौसम विज्ञान विभागले मंगलबार र बुधबार दुवै दिन बागमती प्रदेशका पहाडी भूभागका एक-दुई स्थानमा भारी वर्षाको सम्भावना औँल्याएको छ।