पोखरामा तायाःमचा नृत्य प्रतियोगिता, तेर्सापट्टी र नदीपुर च्याम्पियन

पोखरामा आयोजित २७ औं संस्करणको ‘तायाःमचा नृत्य प्रतियोगिता–२०८३’ को उपाधि खुल्लातर्फ तेर्सापट्टी र महिलातर्फ नदीपुर तायाःमचा नाच समितिले जितेका छन्। नेवाः खल कास्कीको आह्वान तथा लामाचौर नेवाः खल गुठीको आयोजनामा पोखरा–१६ लामाचौरमा सम्पन्न प्रतियोगितामा उनीहरू च्याम्पियन बनेका हुन्। आयोजकका अनुसार खुल्लातर्फ प्रथम भएको तेर्सापट्टीले करिब एक लाख एक हजार रुपैयाँ र महिलातर्फ प्रथम भएको नदीपुरले करिब ४० हजार रुपैयाँ नगदसहित शिल्ड र प्रमाणपत्र प्राप्त गरेका छन्।

खुल्लातर्फ पृथ्वीचोक नेवाः कचा खल दोस्रो, नयाँ बजार सांस्कृतिक समिति तेस्रो र रानीपौवा तायाःमचा नाच समिति सान्त्वना स्थानमा परेका छन्। तिनले क्रमशः करिब ७७ हजार, करिब ५५ हजार र करिब २५ हजार रुपैयाँ पाएको आयोजकले जनाएको छ। महिलातर्फ शिशुवा नेवा कचाः खल दोस्रो, बाघ बजार तायाःमचा समिति तेस्रो र रुपा देउराली नेवाः कचा खल सान्त्वना स्थानमा रहेका छन्।

तिनले क्रमशः करिब ३० हजार, करिब २५ हजार र करिब १५ हजार रुपैयाँ पुरस्कार पाएका छन्। विजेतालाई गण्डकी प्रदेशका आर्थिक मामिला मन्त्री जितबहादुर शेरचनलगायतले पुरस्कार वितरण गर्नुभएको छ।