उत्तराखण्डमा ५.१ म्याग्निच्युडको भूकम्प, सुदूरपश्चिममा धक्का महसुस

भारतको उत्तराखण्ड राज्यमा केन्द्रबिन्दु रहेको भूकम्पको धक्का नेपालको सुदूरपश्चिम प्रदेशमा पनि महसुस भएको छ। मंगलबार राति १० बजेर ३८ मिनेटमा गएको भूकम्पको तीव्रता करिब ५.१ म्याग्निच्युड मापन गरिएको छ। केन्द्रबिन्दु नेपालको पश्चिमी सीमावर्ती जिल्ला दार्चुलाबाट करिब १०० किलोमिटर पश्चिममा रहेको जनाइएको छ।

दार्चुला, बैतडी र डडेल्धुरासहित सुदूरपश्चिमका विभिन्न जिल्लामा कम्पन अनुभव गरिएको छ। राति एक्कासि घर हल्लिएपछि डराएका स्थानीयहरू घरबाहिर निस्किएका थिए। हालसम्म कुनै क्षतिको विवरण प्राप्त भएको छैन।

यसैबीच जल तथा मौसम विज्ञान विभागका अनुसार बुधबार सुदूरपश्चिमका पहाडी र तराई भू-भागका एक-दुई स्थानमा भारी वर्षाको सम्भावना छ। सोही प्रदेशको तराईका केही स्थानमा मेघगर्जन, हावाहुरी र असिनासहित मध्यम वर्षा हुन सक्ने विभागले जनाएको छ।