१५ दिनपछि मालढुङ्गा पुल सञ्चालनमा, बागलुङसहित पश्चिमका जिल्लामा सीधा यातायात

कालीगण्डकीको बाढीले पहुँचमार्ग बगाएपछि १५ दिनदेखि अवरुद्ध बागलुङ र पर्वत जोड्ने मालढुङ्गा पुलमा सोमबारदेखि सवारी आवागमन सुरु भएको छ। असोज ११ गते आएको बाढीले पुलको पर्वततर्फको सडक बगाएको थियो। त्यसपछि बागलुङसहित रोल्पा, रुकुम, जाजरकोट, डोल्पा र सल्यानलगायत पश्चिमका जिल्लामा सीधा यातायात ठप्प भएको थियो।

सडक डिभिजन कार्यालयले ग्याबिन, जियो ब्याग र जियो ग्रिड प्रविधि प्रयोग गरी करिब ३५ मिटर पहुँचमार्ग पुनर्निर्माण गरेको इन्जिनियर अमर अधिकारीले जानकारी दिनुभएको छ। कामदारसँगै नेपाली सेना, नेपाल प्रहरी र सशस्त्र प्रहरी चौबीसै घण्टा खटिएपछि बिहान १० बजेदेखि सवारी चल्न थालेको हो। पूर्वाधार विकासमन्त्री सुनिल लम्सालले दसैँअघि पुल सञ्चालन गर्ने लक्ष्य पूरा भएको बताउनुभएको छ।

मध्यपहाडी लोकमार्ग र कालीगण्डकी करिडोर मिल्ने ठाउँमा रहेको यो पुलले बागलुङ र पूर्वी रुकुमलगायतका जिल्लालाई राष्ट्रिय सडक सञ्जालसँग जोड्छ। पुल बन्द हुँदा बागलुङ बजारमा उपभोग्य सामानको मूल्य बढेको र होटल व्यवसाय सुनसान भएको थियो। बागलुङ कालिका मन्दिर, पञ्चकोट र ढोरपाटन जाने पर्यटकको आवागमन पनि घटेको थियो।

पुल खुलेसँगै यस क्षेत्रको पर्यटन र व्यापार फेरि चलायमान हुने अपेक्षा गरिएको छ।