अमेरिकाले मध्यपूर्वमा सैन्य उपस्थिति बढाउँदै, एसएम–६ उत्पादनमा ठूलो सम्झौता

अमेरिकाले इरान आसपासको मध्यपूर्वी क्षेत्रमा युद्धपोत, लडाकु विमान र सैनिकको तैनाथी बढाउन थालेको छ। अमेरिकी अधिकारीहरूका अनुसार तीनवटा विमानवाहक पोत र दुईवटा मरिन अवतरण समूह इराननजिक राख्ने तयारी भइरहेको छ। युएसएस थियोडोर रुजवेल्ट नेतृत्वको युद्ध समूह गत आइतबार क्यालिफोर्नियाबाट प्रस्थान गरेको रोयटर्सले जनाएको छ।

त्यसको भोलिपल्ट मकिन आइल्यान्ड नेतृत्वको नौसैनिक समूह पनि उतै लागेको छ। रुजवेल्ट नोभेम्बरको मध्यतिर र मकिन आइल्यान्ड समूह नोभेम्बरको अन्त्यसम्म मध्यपूर्व पुग्ने अनुमान छ। अल जजिराका अनुसार यो साता करिब ७ हजार नौसैनिक र करिब २ हजार मरिन सैनिक सान डिएगोबाट मध्यपूर्वतर्फ गएका छन्।

यसैबीच, पेन्टागनले एसएम–६ क्षेप्यास्त्रको उत्पादन बढाउन रेथियोन कम्पनीसँग करिब २४ अर्ब ४० करोड अमेरिकी डलरको पाँच वर्षे सम्झौता गर्ने घोषणा गरेको छ। इरानविरुद्धको युद्धमा खर्च भएको हतियार भण्डार पुनःपूर्ति गर्न यो सम्झौता गरिएको पेन्टागनले जनाएको छ। होर्मुज जलडमरुमा एउटा विशाल तेल ट्यांकरमा अज्ञात वस्तु प्रहार भई आगलागी भएको बेलायती निकाय युके मेरिटाइम ट्रेड अपरेसन्सले जनाएको छ।

प्रहार कसले गर्‍यो भन्ने अझै पुष्टि भएको छैन।