झरीबीच वसन्तपुरमा इन्द्रजात्रा, राष्ट्रपतिद्वारा अवलोकन; भक्तपुरमा इन्द्रायणी जात्रा

मनसुनी झरीका बीच काठमाडौँको वसन्तपुर दरबार क्षेत्रमा शुक्रबार इन्द्रजात्राको मुख्य दिन धुमधामसँग मनाइएको छ। राष्ट्रपति रामचन्द्र पौडेलले न्युरोडको जुद्ध सालिकदेखि पैदल हिँडेर हनुमानढोकास्थित गद्दी बैठक पुगी जात्रा अवलोकन गर्नुभएको छ। परम्पराअनुसार राष्ट्रपतिले कुमारी, गणेश र भैरवका रथमा फूलमाला र दक्षिणा अर्पण गरी रथयात्राको अनुमति दिनुभएको छ।

उपराष्ट्रपति रामसहायप्रसाद यादव, कार्यवाहक प्रधानमन्त्री डा. स्वर्णिम वाग्ले, सभामुख डोलप्रसाद अर्याल र राष्ट्रिय सभाका अध्यक्ष नारायणप्रसाद दाहाल पनि उपस्थित हुनुहुन्थ्यो। काठमाडौँ महानगरपालिकाका प्रमुख, उपप्रमुख र विभिन्न देशका पाहुना पनि जात्रा हेर्न वसन्तपुर पुगेका थिए।

प्रधानमन्त्री बालेन्द्र शाह संयुक्त राष्ट्रसंघको महासभामा भाग लिन न्युयोर्कमा रहनुभएकाले जात्रामा सहभागी हुनुभएन। मन्त्रीहरू सोविता गौतम, प्रतिभा रावल, सीता वादी, निशा मेहता र गीता चौधरी नेवारी पहिरन हाकुपटासीमा सजिएर पुग्नुभएको थियो। मन्त्री रावलले सबै महिला मन्त्रीलाई हाकुपटासी उपहार दिनुभएको हो।

कुमारी घरबाट निस्किएको रथयात्रा हेर्न वसन्तपुर र आसपासका सडकमा ठूलो भीड जम्मा भएको थियो। जात्रामा लाखे नाच, पुलुकिसी, देवप्याखँ र सांस्कृतिक झाँकी प्रदर्शन गरिएका थिए। यता भक्तपुरमा खौमाको देवगृहबाट इन्द्रायणी देवतालाई खटमा राखी नगरको आधा भाग परिक्रमा गराएर सिद्धपोखरी अर्थात् इन्द्र दह पुर्‍याइएको छ।

त्यहाँ शुक्रबार राति र शनिबार पूर्णिमाका दिनभर मेला लाग्ने परम्परा छ। शनिबार साँझ बाजागाजासहित इन्द्रायणीलाई फेरि देवगृहमा भित्र्याएर जात्रा सम्पन्न गरिनेछ।