महिलाले रथ तानेसँगै आठ दिने इन्द्रजात्रा सम्पन्न

काठमाडौँ उपत्यकाको आठ दिन लामो इन्द्रजात्रा मङ्गलबार महिलाले मात्र रथ तान्ने 'नानिचा याः' सँगै सम्पन्न भएको छ। अन्तिम दिन जीवित देवी कुमारी, गणेश र भैरवका रथ वसन्तपुरबाट निकालिएका थिए। बाजागाजासहितको रथयात्रा प्याफल, नरदेवी, किलागल, असन, इन्द्रचोक र मखन परिक्रमा गरेर फेरि वसन्तपुर फर्किएको छ।

परम्परागत नेवारी पोसाक हाकुपटासी लगाएका सयौँ महिला र युवती रथ तान्न सहभागी थिए। राणाकालमा प्रधानमन्त्री जुद्धशमशेरले किलागलकी नानिचाको इच्छाअनुसार तेस्रो दिनको जात्रा थपेको इतिहास छ। समुदायको सहमतिमा २०६९ सालदेखि यो दिन महिलाले मात्र रथ तान्दै आएका छन्।

पछिल्ला वर्षमा यो जात्रा महिला सशक्तीकरण र लैङ्गिक समानताको मञ्च बनेको छ। राष्ट्रपति रामचन्द्र पौडेलले हनुमानढोका पुगेर गणेश, भैरव र कुमारीबाट टीका र प्रसाद ग्रहण गर्नुभएको छ। राष्ट्राध्यक्षले टीका ग्रहणपछि कुमारीसँग खड्ग साट्ने परम्परा छ।

मङ्गलबार राति साइतअनुसार इन्द्रध्वज फहराइएको लिङ्गो ढालिएको छ। ढालिएको लिङ्गो तान्दै बागमती नदीमा लगेर विसर्जन गरेपछि जात्रा औपचारिक रूपमा टुङ्गिन्छ। भदौ शुक्ल द्वादशीमा हनुमानढोका दरबार क्षेत्रमा इन्द्रध्वज उठाएर यो जात्रा सुरु गरिएको थियो।

गुठी संस्थानले लिङ्गो ढालेसँगै आठ दिने जात्रा समापन भएको जनाएको छ।